Kulturi

Nunatsinni atuakkiortut nutaat

Oqaluttuaaraliornermi unammisitsinerup, Allattap kingorna Nunatsinni inuusuttut pingasut oqaluttuaaraliaat soqutigineqarluarput.

fra venstre: sidste års vinder Miiannguaq Olsvig, sidste års vinder Maaliaaraq Nielsen, sidste års vinder og dette års dommer Sørine Steenholdt, milik publishing ejer Lene Therkildsen, leder af Landsbiblioteket Elisa Jeremiassen, leder af børnebiblioteket

Allattoq Inge S. Rasmussen, Apollo Jeremiassen

decembarip 22-at 2015 12:31

Inuiaqatigiit kalaallit ullumikkut inooriaasiat aallaavigalugu inuusuttut, Niviaq Korneliussen, Sørine Steenholdt aamma Pivinnguaq Mørch atuakkiaqarput.

Taakku tamarmik oqaluttuaaraliorluni unammisitsinermi, Allattami peqataareerput.

Taakku Nunatsinni atuakkiortarneq eqqarsaatigalugu nutaaliortutut taaneqarsinnaasut, atuakkanik saqqummersitsisarfimmi piginnittup, Lene Therkelsenip nalilerpaa.

- Tamanna pissaganartorujussuartut taaneqarsinnaavoq. Tassalu atuakkioriaatsimik inuusuttut taakku pilersitsipput ilaatigut unammisitsinerup kingorna aammali nammineerlutik atuakkanik saqqummersitsinermikkut nutaaliorlutik, Lene Therkelsen oqarpoq.

Aamma atuaruk Kalaallit inuusuttut atuakkiaat juullimi tunissutigineqarluassasut

Inuusuttut atuakkiortut taakku unammisitsinermut Allamut ilaanngikkaluarunilluunniit namminneerlutik atuakkanik saqqummersitsisimassagaluartut, Lene Therkelsenip qulartinngilaa, taamaattorlu Allattamik unammisitsineq taakkununnga pingaaruteqarluarsimaqisoq, taanna isumaqarpoq.

- Allattap qanoq taakkununnga pingaaruteqarsimanera isiginngitsuusaaginnarneqarsinnaanngilaq. Tassami Allattap pilersippaa inuusuttut akornanni atuakkiorusuttoqalernerunera atuakkanillu atuarusuttoqarlualernera.

Atuakkanik saqqummersitsisarfimmik, Milik Publishingimik piginnittoq, Lene Therkelsen taama oqarpoq.