Royal Arctic Line: Piareersarluarsimasuugutta kukkunerit pinngitsoorsimassagaluarput
Royal Arctic Linemi assartuussinermi kukkunerit suli pisarput, aasalli aallartinneranut naleqqiullugit maanna ikinnerungaatsiarput.
Sapaatit akunnerata siuliani (sap. ak. 36-mi) Royal Arctic Linep containerinik assartuussinerani kukkunerit qulit pisimapput. Sapaatit akunnerinilu kingullerni arfineq-pingasuni kukkunerit qulit ataateqqasarpaat.
Aasap aallartinnerani kukkunerit amerlanerpaaffigisaannit ikinnerungaatsiarput. Royal Arctic Linemulli suli ajornartorsiutaavoq.
Pisortaanerlu Verner Hammeken naapertorlugu, kukkunerit suli pisartut umiarsuaatileqatigiiffiup inniminniinermut systemertaavani teknikkikkut kukkuneqarneranik sulisullu sungiussiniarnerinik pissuteqarput.
AAMMA ATUARUK RAL-ip assartuinermi ajornartorsiutai aaqqikkiartulerunarput
- Aallaqqaammut ajornartorsiutigineqartut systemimi isumagisassanut tunngassuteqarnerupput, maannalu systemi pigilerparput suleriaatsit allanngortinneqarnissaannik pisariaqartitsiffiusoq, pisortaaneq oqarpoq.
Kingumullu qiviaraanni ajornartorsiutaasut umiarsuaatileqatigiiffiup tupaallaatigisimavai.
- Piffissap ingerlanerani tupaallaatigeqisatsinnik pisoqartarpoq aallartinneralu assut ulapinnarsimavoq, pisortaaneq oqarpoq.
Kukkunerillu ilarpassui aaqqiissutissanillu nassaarniarnermut piffissamik sivisuumik atuisoqarnera piareersarnerusoqarsimasuuppat pinngitsoorneqarsimasinnaagaluartoq, Verner Hammekenip nassuerutigaa.
AAMMA ATUARUK RAL kukkunernut utoqqatsertoq
- Kingumut qiviarutta, ukiumi pisukinnerpaaffiusumi atuutilersitsinissaq akuerisimassanngikkaluarparput. Ukiumi pisoqarnerpaaffiusumi atuutilersissimassagaluarparput, taamaaliornikkullu kukkunerit ajornerpaat iluarsiissuteqarfiginissaannut qaammatinik sisamanik piareersarfeqarsimassagaluarluta, pisortaaneq oqarpoq.
Umiarsuaatileqatigiiffiup sullitai amerlasuut ajornartorsiutinit eqqugaasimapput. KNR-ip ilaatigut Pilersuisoq, Pisiffik, Ilulissani Hotel Hvide Falk, ajornartorsiutinik eqqugaasimasut oqaloqatigisimavai.
Aamma Royal Greenlandip ukiup affaanut nalunaarusiaani atuarneqarsinnaavoq RAL-ip assartuussinikkut ajornartorsiuteqarnera pissutigalugu Kangianut nassiussat kinguaattoorutigineqarsimasut.
AAMMA ATUARUK RAL-ip kukkuluttorneranik Pilersuisoq eqqugaaqqasoq
Kukkunerit iluarsinissaannik suliaqarneq suli ingerlavoq. Ilaatigut inniminniinermut systemip ilaa ajornaannerulersinneqassaaq, assersuutigalugu umiarsuarmik allamik toqqaasoornissaq ajornarnerulersillugu.
Pisortaanerlu naapertorlugu sulisut sungiusarneqarnerunissaat systemimilu arlalinnik aaqqiisoqarnissaa suli pisariaqartinneqarpoq.
Kukkusoqartarunnaarpat suliaq aatsaat naammassineqassaaq, Verner Hammeken taama oqarpoq.
AAMMA ATUARUK RAL-ip assartuinini ajornartorsiutigigaa
- Piffissap ingerlanerani kukkusoqartarunnaartariaqarpoq. Tamannalu aamma anguniagaavoq, pisortaaneq oqarpoq.
RAL-illu tamatuma ukioq manna anguneqarnissaa siunniussimavaa.
- 2017-imiinnaq ajornartorsiutit pissapput qaangerneqarlutillu. Tamanna qularinngilara, pisortaaneq oqarpoq.
