Pia Kjærsgaard Folketingimi siulittaasutut

Dansk Folkepartimeersoq Pia Kjærsgaard, folketingimi siulittaasunngussaaq.

Liberal Alliancep amerlanerussusiineratigut tamanna qularnarunnaartoq, TV2-mit ilisimatitsissutigineqarpoq.   

Pia Kjærsgaard Dansk Folkepartimik pilersitseqataavoq siornatigullu siulittaasuulluni arnanilu folketingimi siulittaasuni siulliup aapparalugu.

Socialdemokratineersoq Ingeborg Hansen arnani siullersaalluni  - taamani Landstingiusumi - 1950-imi siulittaasunngorpoq taamalu nunarsuarmi inatsisartoqarnermi arnani siullerpaatut siulittaasunngorluni.

Pia Kjærsgaardip siulittaasunngornissaanut tapersersuinissaminut atatillugu  Liberal Alliancep piumasarigaluarpaa, qallunaat akissarsiaqarnerpaat akileraartarnikkut oqilisaavigineqassasut.

TV2-mit oqaatigineqartut naapertorlugit Liberal Alliancep siulittaasuata Anders Samuelsenip folketingimi aningaasaqarnermut ataatsimiititaliami siulittaasuutitaqalernissaanut taarsiullugu Pia Kjærsgaardip siulittaasunngornissaa qulakkeerneqarpoq. Tamannali suli uppernarsarneqarsinnaasimanngilaq.

Maannalu siornatigut ministeriunerusimalersoq Helle Thorning-Schmidt folketingimi siulittaasussatut piukkunneqartunut aamma ilaagaluarpoq.