Ilisimatooq sulisussaaleqinermut aaqqiissutissarsiorniartoq

Tamanna misissorniarneqalerpoq ukiut pingasut ingerlaneranni Verena Gisela Huppertip nutaamik ph.d-iliorneratigut.

Suliniummi misissorneqassaaq atorfiit pisariaqartitatut inuttaqanngitsut suliffeqarfinnut qanoq sunniuteqartarnersut. Taassuma saniatigut suliniummi ajornartorsiutip qanoq annikillisarneqarsinnaanera paasiniarneqassaaq.

Verena Gisela Huppertip neriuutigaa ilisimatusarnermi suliniunni ajornartorsiutit ilaannik aaqqeeqataajumaartoq.

- Neriuutigaa ilisimasanik nutaanik pilersitseqataanissaq, taamaalilluni Kalaallit Nunaanni ajornartorsiutit ilaannik aaqqeeqataalluni.

AAMMA ATUARUK Ilinniagartuut qanoq iliorluni pigiinnarneqarsinnaappat?

Verena Gisela Huppertip aasaanerani 2017-miit Nuummi najugaqalernissani qilanaaraa, paasisammi siunissami inuiaqatigiinni atorneqarsinnaasut pilersinniaraanni nunami pineqartumi najugaqartariaqarpoq.

- Kalaallinut tunngasunik ilisimatusarniaraanni tamaaniittariaqarpoq suliaq ulluinnarni atorsinnaalluni tatiginarlunilu tigussaassappat, taanna oqarpoq.

Verena Gisela Huppertip suliaa siusinnerusukkut soqutigineqarsimavoq Nuummi Canadamilu sulisartut piukkunnartut atorfimminniiginnarnissaat pillugu specialeliorsimagami. Taamanikkuttaaq Nuummi najugaqarpoq taamanilu paasisimallugu meeqqanik paaqqinnittussaaleqineq, inissaaleqineq ulapippallaarnerlu ilinniagartuut atorfimmiiginnarnissaat ajornakusoortittaraat.
Ph.d.-liassaa nutaaq apriilip aallaqqaataani aallartittussaq Aalborg Universitetip, Arctic Consensusip, Kommuneqarfik Sermersuup Sulisitsisullu peqatigiiffiata suleqatigiinnerisigut piviusunngussaaq.

AAMMA ATUARUK Nunanit allaneersut tikisinneqartariaqassasut