Peter Olsenip ilinniartut isumaqatigai: Ineqaannarsinnaasariaqarput

Ilinniartuuguit naartulersimallutillu kollegiat annaaratarsinnaavat.

Inatsisimmi malillugit erninermut atatillugu ilinnianngiffeqaruit tamanna ilinniarnernik unitsirsinertut isigineqassaq, ilinniarninnilu ineqartitaaanissamut pisinnaatitaaffeqarunnaarlutit.

Ilisimatusarfimmi ilinniartut siunnersuisoqatigiiffiata Pitap ajornartorsiutitut tamanna isigaat, Naalakkersuisullu inatsit allanngortittariaqaraat, ilinniartut siunnersuisoqatigiiffiat isumaqarpoq.

AAMMA ATUARUK Ilinniartut siunnersuisoqatigiiffiat: Meerartaaqqammisut kollegiamiiginnarsinnaasariaqarput

Ilinniartitaanermut naalakkersuisup, Peter Olsenip Pitaq isumaqatigaa. Ilumummi isumaqataaqaaq.

- Ilinniartut siunnersuisoqatigiiffiat, Pitaq, qutsavigerusuppakka eqqummaarilluarsimanerannut naammagittaalliutaanullu. Isumaqarpungalu naammagittaalliutaat inissaminiittoq. Aamma paasilluarsinnaavara. Kisianni uuma inatsisip tunngavia paasilluakutsooraluarpara. Tassami una tunngaviusimammat kollegiassaaleqineq aamma inissaaleqineq tunngavigalugu inatsit pilersinneqarsimammat, Peter Olsen oqarpoq. 

- Kisianni taanna inatsit isumaqatigivallaanngilara, isumaqarama arnanut minnerunngitsumillu naartusunut immikkoortitsinerusoq. Immikkoortitsinerlu uanga inooqataaffigisinnaanngilara akuerisinnaanngilaralu.

Siusinnerpaamik Inatsisartut upernaakkut 2022-mi ataatsimiineranni

Pitap allanngortitsinissamut piumasaqaataa naalakkersuisoqarfimmiit misissorneqaqqullugu, KNR-imut taanna nassuiaavoq.

Sulialli misissorneqarnissaa sivisulaarsinnaasoq, Peter Olsen nassuiaavoq. Naalakkersuisummi inatsimmut allannguutissamik siusinnerpaamik Inatsisartut upernassamut ataatsimiilerpata innersuussisinnaapput. 

- Naluara qaqugorpiaq naammasiumaarnersoq, kisianni paasisakka naapertorlugit inatsimmik allannguisoqassappat, taava inatsimmik allanguiniartarneq pisariuvoq sivisusarporlu. Taamaattumik naatsorsuutigisinnaavaat aappaagu, 2022-imi, siusinnerpaammik Inatsisartut upernaakkut ataatsimiinneranni taanna inatsimmut allannguutissaq nutaaq aatsaat saqqummiussinnaassallugu.

Ilinniartut inissaat amigaataasorujussuupput. Ilinniartummi inissaaleqisut qanoq iliorfigineqassappat? 

- Taanna ugguarnarpoq ajuusaarnarporlu, sumiluunniit taanna ullutsinni nunatsinni kollegiassaaleqinerujussuaq assorturuminaappoq. Kisianni qanorluunniit ikkaluarpat, sumulluunniit saatikkaluarutsigu pitsaasuunngilaq naartuleraanni taavalu naartulernerup nalaanni atuanngiffeqaraanni meerartaarsimalluni kollegiaminngaanniit anisitaasariaqalertarneq pitsaasuunngilaq, Peter Olsen oqarpoq. 

- Nalunngilarput amerlasoorpassuit ilinniarlutik angajoqqaamininngaanniit tingereertarput ilaatigullu amerlasuut aamma inersimasunngoreeramik illoqarfimminut angajoqqaaminullu angerlarfissaqanngillat, inuunerminnik namminneq aallartitsereertaramik. Taava sumunnassagamik angerlarfissaqanngikkunik? Taamaattumik taanna pitsaasuunngilaq.