Peter Grønvold Samuelsenip eqqartuussut nunatta eqqartuussisuuneqarfianut ingerlateqqinniarunnaaraa
![](/sites/default/files/styles/image_934x467/public/article_images/peter_g_foto.jpg?itok=LFiHF_Rq)
KNI-p pisortarisimasaata, Peter Grønvold Samuelsenip suliffeqarfimmi arnanut sulisunut kannguttaatsuliorsimanerarneqarnerani eqqartuussivimmi suliaq nunatta eqqartuussisuuneqarfianut suliarineqartussaajunnaarpoq.
Taassuma eqqartuussissuserisua, Finn Meinel KNR-imut paasissutissiivoq.
Peter Grønvold Samuelsen taamaalilluni Eqqartuussisoqarfik Qeqqatap ukioq manna apriilimi eqqartuussutaa malilluni qaammatini pingasuni pineqaatissinneqarsimasunut inissiisarfimmiittussanngorpoq.
Eqqartuussut arnanut katillugit arfinilinnut politiinut unnerluussisunut kannguttaatsuliorsimanerarneqarneranut tunngavoq.
Pisortaasimasoq arnanut arfinilinnut immikkut 5.000 koruuninik aamma akiliisussanngortinneqarnikuuvoq.
AAMMA ATUARUK KNI-mi pisortaasimasoq kannguttaatsuliortutut eqqartuunneqartoq: Pineqaatissinneqarsimasunut inissiisarfimmiittussanngortoq
Peter Grønvold Samuelsen naak isumaqataanngikkaluarluni eqqartuussut akuerigaa
Sisimiuni eqqartuussivimmit qaammatinik pingasunik pineqaatissiisoqarnerani Peter Grønvold Samuelsenip taassumalu eqqartuussissuserisuata suliaq nunatta eqqartuussisuuneqarfianut ingerlateqqinniarlugu aalajangerpaat, pinngitsuutinneqarnissarlu piumasaralugu.
Pineqartulli eqqartuussivimmi suliaq maanna unitsillugu eqqartuussiviup eqqartuussutaa akueriniarlugu aalajangerpaa.
- Eqqartuussivimmi suliaq sivisuvoq, tamannalu (Peter Grønvold Samuelsenimik, aaqq.) unnerluutiginnittunut aammali Petermut ilaqutaasullu artorsaatigineqarpoq, Finn Meinel oqarpoq.
Peter Grønvold Samuelsenili pinngitsutut suli isigisoq, eqqartuussissuserisua paasissutissiivoq.
Naak kannguttaatsuliornermut eqqartuussuteqaraluartoq pineqartoq arlaannut kannguttaatsuliorsimanngissorivoq. Aamma naak arnat tassunga unnerluussisut kannguttaatsuliorfigineqarlutik misigisimagaluartut tamanna siunertaanngisaannartoq, Finn Meinel oqarpoq.
KNI-lli pisortarisimasaata inuunini ingerlateqqinniarlugu eqqartuussut maanna akueraa.
- Peterp suliassanngortitseqqinnerup taamaatinnissaa maanna aalajangerpaa. Aamma naak naggataa ilorrisimaarutiginngikkaluarlugu, aamma naak suliap eqqartorneqarnera eqqartuussummilu tunngaviusoq isumaqatinngikkaluarlugu, Finn Meinel oqarpoq.
Politiit unnerluussisussaatitaasuisa Samuelsenip nunatta eqqartuussisuuneqarfianut ingerlateqqitassanngortitsinerata kingorna eqqartuussiviup aalajangernera aamma suliassanngorteqqinnikuuaat. Unnerluussisussaatitaasut akerliullutik suliassanngortitseqqinneq aamma taamaatiinnarpaat.
KNR-ip politiit Peter Grønvold Samuelsenimut tunngatillugu unnerluussisussaatitaasuat, Anne Kathrine Clinton oqaaseqartinniarsaraa.
Arnat arfinillit kissaatiginngisamik attuuaneqartut
61-inik ukiulik, Peter Grønvold Samuelsen arnanut katillugit arfinilinnut Namminersorlutik Oqartussat suliffeqarfiutaani sulisunut kannguttaatsuliorsimasutut unnerluutigineqarpoq.
Kannguttaatsuliornerit KNI-p Sisimiuni allaffiani aamma sulinermi angalanerni piffissami 2016-imi 2021-mut pisimanerarneqarput.
Arnat arfinillit atorfeqarnermi nalaanni pisortarisimasaminnit kissaatiginngisaminnik attorneqartarlutik eqqartuussivimmi oqaatiginikuuaat. Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
AAMMA ATUARUK Peter Grønvoldimit kannguttaatsuliorfigineqarsimasut: Ikinnerpaat inoqamminnik politiinut nalunaarutiginnikkusuttarput
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvold Samuelsenip eqqartuussivimmi unnerluutigineqartut tamarmik eqqunngitsuunerarlutik pinngitsuutinneqarnissaminik piumasaqaraluarpoq.
KNI-p pisortarisimasaata kannguttaatsuliorsimasutut politiinut unnerluutigineqarnera 2021-mi marsimi saqqummiunneqarpoq.
Tamanna sioqqutitsiarlugu Peter Grønvold Samuelsen atorfimminit soraarsimavoq. Taanna KNI-mi ukiuni arfineq-marlunni pisortaaneruvoq.