PET: Danmarkimi peqqarniisaarniartoqarsinnaanera Gazami sorsuttoqarnerani aarlerinaateqarnerulerpoq
Danmarkimi peqqarniisaarniartoqarsinnaanera aarlerinaateqarnerulerpoq.
Danmarkimi politiit isertortumik paasiniaasartui PET, aarlerinaatilinnik nutaamik naliliinerminni taama allapput.
Israelip Hamasillu akornanni sorsuttoqarnera, musliminillu narrunarsaasoqartarnera pissutaanerpaasut PET-p naliliinermini allaaseraa.
- Muslimit illernaartuutitaannik Koranimik ikuallaasarnerit, Kangia Qiterlermilu aaqqiagiinngittoqarnera Danmarkimi peqqarniisaarniartoqaratarsinnaaneranik aarlerinaateqalersitsipput. Pisut ataatsimut isigalugit nalilerparput Danmarkimi peqqarniisaarniartoqarsinnaanera aarlerinaateqarnerulersoq, Michael Hansen, PET-p peqqarniisaarniartoqartarneranik naliliisarfiani pisortaq tusagassiorfinnut nalunaarummi allaaserisaqarpoq.
Peqqarniisaarniartoqarsinnaaneranut naliliinermi annertunerpaaffia 5-iusoq maanna aarlerinaatitut naliliineq 4-tut nalilerneqarpoq.
Tassa imaappoq: Danmarkimi peqqarniisaarniartoqarsinnaanera aarlerinaateqarpoq, Danmarkimimi peqqarniisaarniartoqarnissaanut pilersaarusiortoqarsimavoq, sulili saassussisoqarnani.