Ulloq unnuarlu angerlarsimaffimmi: Perorsaasunut ikiorti niviarsiaqqamut pinngitsaaleeriartoq

Nuummi ulloq unnuarlu angerlarsimaffimmi Qaamasumi angut perorsaanermi ikiorti niviarsiaqqamut 16-inik ukiulimmut angerlasimaffimmiittumut pinngitsaaliiniarsimasutut allatullu pinngitsaaleeriarsimasutut eqqartuunneqarpoq. Radiokkut aallakaatittakkami Inuiaat Tillerneranni ataasinngornermi ualikkut taanna eqqartorneqarpoq.
marsip 14-at 2018 19:00

Angut 31-nik ukiulik Sermersuup eqqartuussivianit ukiup aappaa affaq isertitsivimmiittussanngortinneqarpoq. Tamatuma saniatigut meeqqanik inuusuttunillu 18-iliisimanngitsunik ukiuni marlunni atorfimmini sunngiffimminiluunniit sullisseqqusaassanngilaq.

Eqqartuussineq siorna septembarip aqqaneq aappaanni pivoq. Eqqartuussutip nalunaarutigineqarnerani takuneqarsinnaavoq eqqartuussivik angutip atorfimminik atornerluisimanera pissutigalugu eqqartuussummik sukannernerulersitsisimasoq.

Eqqartuussisut allattaaviat naapertorlugu naapertuilluanngitsuliorneq siorna apriilimi pivoq. 16-inik ukiulik eqqartuussivimmi nassuiaavoq unnuakkut itersimalluni perorsaanermi ikiortip 31-inik ukillip inimiunut iserfigigaani oqarlunilu: Aalakoorpunga.

Siullermik ineqataata angerlarsimanngitsup siniffianut angut innarpoq, kingornali niviarsiaqqamut nuuppoq kanngutsaatsuliorfigalugulu. Niviarsiararli qimaasinnaasimavoq pingaartorlu kalerrillugu.

Unnerluunneqartoq nassuinngilaq unnerluussutilluunniit akuerinagit. Angut oqarpoq imerniartarfiup atisaasivia qimakkamiulli aalakoortunut isertitsivimmi iternissami tungaanut eqqaamasaqarsimanani.

AAMMA ATUARUK MIO: Meeqqat Facebookkimi atornelunneqatsaaliortigit

31-nik ukiullip illersuisuata piumasarisimavaa angutip pinngitsaaleeriarsimaneragaanera atorunnaarsinneqassasoq,  eqqaartuussivimmulli aalajangiussassanngortippaa ulloq unnuarlu angerlarsimaffimmiittumik allatut pinngitsaaleeriarsimasutut pineqaatissinneqarnissaata nalilerneqarnissaa, sivisunerpaamilli ukiorli ataaseq inissiisarfimmiinnissaa piumasaralugu.

Eqqartuussiviup unnerluussisuutitaasut piumasaqaataat malillugu ukiup aappaa affaq isertitsivimmiittussanngortippaa, aammalu meeqqanik inuusuttunillu 18-iliisimanngitsunik ukiuni marlunni atorfimmini sunngiffimminiluunniit sullisseqqusaassanngilaq.

Niviarsiaraq ulloq unnuarlu angerlarsimaffimmiikkunnaareerpoq.

AAMMA ATUARUK Suliffeqarfiup atornerluisimasoq nakkutilliisutut atorfinitsippaa - taamaalioqqipporlu