Suliffeqarfiup atornerluisimasoq nakkutilliisutut atorfinitsippaa - taamaalioqqipporlu

Angut killiligaanngitsumik Danmarkimi tarnimikkut napparsimasunut inissiisarfimmiittussanngorlugu Eqqartuussisoqarfik Nuummi februaarimi eqqartuunneqarpoq.

Angutip 13-inik ukiulik 2016-imi qaammatit pingasut ingerlaneranni arlaleriarluni atoqatigisimallugu nassuerutigaa.

Eqqartuussiviup angut pisimasuni arfinilinni unnerluussutaasuni pisuutillugu 2017-imi februaarip qaammataani eqqartuuppaa. Tassanilu blok 10-p majuartarfiani, Nuutoqqami containerip tunuani ISS-imilu nakkutilliisutut sulinermini nalaani Pisiffiup perusuersartarfiani niviarsiaqqamik ukiukitsumik atoqateqarsimasutut pisuutinneqarluni pineqaatissiissutaasumik eqqartuunneqarpoq.

Pinerluttuliorfini aningaasanik akileraa

Niviarsiararli atoqatigereernerata kingorna tamatigut 50-100 koruuninik akilertarsimaneranut pinngitsuutinneqarpoq. Eqqartuussut naapertorlugu eqqartuussiviup aningaasat atoqatigiinnermut akiliutaasimanersut uppernarsaaatissaqannginnerarpai.

Eqqartuussinermi nakorsat eqqartuussinermi siunersiortagaasartut angut avatanngiisiminut navianartutut nalilerpaat eqqarsartaatsimikkullu napparsimasunut inissiisarfimmiittariaqartutut nalilerlugu. Eqqartuussiviup naliliineq isumaqatigalugu angut nunatsinnit pillaatini sakkortunerpaamik parnaarussassanngortippaa.

Eqqartuunneqaqqittoq

Angut taama pinerlunnermut aappassaa eqqartuunneqarpoq. Angut meeqqanik arfinilinnik 12-13-inillu ukiulinnik atoqateqarsimasutut ukiuni marlunni pineqaatissinneqarsimasunut inissiisarfimmiittussanngorlugu 2011-mi eqqartuunneqarpoq.

Eqqartuussummit siullermit iperagaareerami angut ISS-imi nakkutilliisutut 2015 naajartortoq atorfinippoq.

Naak angutip pillagaasimanermut allagartaani meeqqanik ukiukitsunik atoqateqarsimasutut eqqartuunneqarsimasutut allagartaqaraluartoq, ISS-ip angut Nuummi Pisiffimmi, unnukkut meeqqanik inuusuttunillu isersimaffigineqartartumi, nakkutilliisutut sulilersippaat.

Niviarsiaqqap 13-inik ukiullip atoqatiginerata saniatigut angutip 40-t missaannik ukiullip allat arlaqartut Pisiffiup perusuersartarfiani aamma atoqatigisimanerarpai. Taakkuli ukiukitsuunersut paasissutissartaqanngilaq.

Atorfinitsinneqarnera ajuusaarutigigaat

ISS-ip nunatsinni immikkoortortaqarfia nunatsinni inuussutissarsiutinik ingerlataqartunut 2016-imi tunineqarpoq suliffeqarfillu allanngorluni Greenland Facility Servicesimik, GFS-imik taaguuteqalerpoq.

Taakku angut 2015-imi decembarimit qaammatit pingasuni atorfeqarsimasoq allattugaateqarfimminni takusinnaanerarpaat. Allattugaateqarfimmili piffissami tassani angut ISS-imi atorfeqarmat allanik takusaqarsinnaannginnerarput.

ISS-ip Danmarkimi immikkoortortaqarfiata kukkusoqarsimanera nassuerutigaa. KNR-illu sapaatip akunnerani matumani aatsaat attaveqarneratigut tamatuminnga ilisimasaqalernerarput.

- Suliaq ilungersunartutut tiguarput, angutillu iliuuserisimasai akuerisinnaanngilluinnarpagut. Siullertut, niviarsiaraq ilaqutaalu eqqarsaatitsinniipput, ISS KNR-imut akissuteqarluni allappoq.

Angutip atorfinitsinneqarsimanera kukkunerusoq atorfinitsinneqartussaanngikkaluartorlu ilisimatitsissutigaat.

- Kalaallit Nunaanni suliffeqarfik uatsinnut atammat ingerlatseriaaserput atugassarititaasullu malinneqarnissaat piumasaqaataavoq. Tamatumani nakkutilliisunik atorfinitsitsiniarnermi pillagaasimannginnerup allagartaanik ilaatigut takutitseqqaarnissaq piumasaqaataagaluarpoq.

- Suliami uani atorfinitsitsinerup ingerlanerani ingerlatseriaatsimi kukkusoqarsimarpasippoq angut atorfinitsinneqanngilluinnartussaagaluarpoq. Tamanna ajuusaarutigingaarparput, ISS allappoq.

Eqqartuussummik suliareqqitassanngortitsineq marlunngorpat aallartissasoq

Angut marlunngorpat eqqartuussivimmeeqqissaaq tamatumuuna Uummannami nunatta eqqartuussisuuneqarfiani eqqartuussisoqassaaq. Eqqartuussinermi matumani angutip eqqartuussissuserisuata Eqqartuussiviup angut killigaanngitsumik pineqaatissinneqartussanngorlugu februaarimi eqqartuussutaanit sakkukinnerusumik pillaasoqarnissaa piumasariniarpaa.

Angutip illersuisua, Ulrik Blidorf eqqartuussivimmi suliamut tunngatillugu oqaaseqarusunngilaq, eqqartuussivimmili angut niviarsiaqqap ukiuinik ilisimanninngissimanerarpoq. Tamannali eqqartuussiviup itigartitsissutigaa tassa niviarsiaraq takullugu ukiukitsuusoq, isikkuatigut pissusaatigullu takuneqarsinnaalluarmat. Tamatuma saniatigut niviarsiaqqap arnaata angut niviarsiaraq ukiukitsuusoq oqarfigisimavaa.

Nunatsinni ISS 2016-ip qiteqqunnerani nunatsinni suliffeqarfimmit pisiarineqarpoq Greenland Facility Servicesimik taaguuteqalerluni. KNR-ip GFS attaveqarfigaa, suliffeqarfiullu sulisumi pillagaasimannginnermut allagartamik tunniussisussaatitaanerarpai, atorfinereernerisalu kingorna pillagaasimannginnermut allagartamik ukiumut ataasiarlutik takutitsisussaatitaanerarlugit.