Peqqissutsimut aqutsisoqarfimmi pisortaq portørit ataatsimeeqatiginissaat sioqqullugu: oqaloqatigiilluarnissaq
Kalaallit Nunaanni peqqinnissaqarfimmi pisortaq Joanis Erik Køtlum ullumi
oqaloqatigaarput, taannalu aperaarput, portørit sulinerminnik atukkaminnik naammagittaalliornerat qanoq isumaqarfigineraa.
- Ilungersunartumik inissisimanertik pillugu naammagittaalliornerat qanoq aaqqiivigineqarsinnaanersoq pillugu oqaloqatiginiarpagut, Joanis Erik Køtlum akivoq.
Portørit sinnerlugit oqaaseqartartoq Ujaraq Jessen Heinrich KNR-imut ullumi oqarpoq, sulinerminnik unititsigunik soraarsitaanermik imaluunnit soraarsitaanissamik siorasaaruteqarnermik kinguneqasinnaasoq, tamannalumi Joanis Erik Køtlumip ilumoornerarpaa:
- Aallaqqaammut oqaloqatigerusuttorujussuuavut. Tassami suliffiup iluani aaqqeeriutissaqaqaaq. Kisianni suliamik unitsitsinissamik tusagassiutitigut nalunaartoqarpat, inatsimmik unioqqutitsilluni iliuutsitut isigaarput, oqarfigaavullu iliussissaat atorfinitsitaasimanermut tunngasuni inatsisitigut kinguneqarsinnaasoq. Kisianni erseqqinnerusumik oqarfiginngissoraakka. Taamatut kinguneqartitsinissarput neriuutiginngilarput, tassami portørigut suleqatigiiupput pikkorissut pitsaasumillu suleqatigerusuppagut.
AAMMA ATUARUK Portørit sulinerminnik unitsitsigallarniarnertik akunnernik tallimanik kinguartikkaat
Siusinnerusukkkut eqqaneqareersutut portørit ataatsimeeqatigiinnissartik ualeru pingasunut kinguartippaat. Peqqissutsimut Aqutsioqarfimmeersut ataatsimiinnermi peqataassapput.
Ataatsimeeqatigiinnissarlu Joanis Erik Køtlumip neriulluarfigaa:
- Siullermik pingaarnertullu oqaloqatigiilluarnissaq paaseqatigiilluarnissarlu illuatungeriit isumaannik paaseqatigiinnissaq pingaaruteqarpoq, unammilligassallu taamatut ittut siunissami qanoq periuseqarfigissanerigut paasissallugu, immitsinnut ungasippallaarunnaarluta, Peqqissutsimut Aqutsisoqarfimmi pisortaq Joanis Erik Køtlum
Portørit tallimanngornermi quliniiit marluk tungaanut sulinerminnik unititsiniarlutik siullermik marlunngornermi nalunaarutigigaluarpaat.
Peqqissutsimut Aqutsisoqarfik portørillu sulinermik kattuffiat SIK aviisimut Sermitsiaq.Ag-mut pingasunngornermi oqarput, sulinermik unititsineq aningaasarsiat pillugit isumaqatigiinniarnermut attuumassuteqartuunngippat unioqqutitsinerusoq.
