Portørit sulinerminnik unitsitsigallarniarnertik akunnernik tallimanik kinguartikkaat
Nuummi Dronning Ingridip Napparsimmavissuani portørit sulinertik ullumi tallimanngornermi ullaap tungaani nalunaaqutaq quliniit akunnerni sisamani unitsikkallarniarlugu marlunngormat nalunaarutigigaluarpaat, sulinerminnilli unitsitsigallarlutik ataatsimiinnissaasa aallartinnissaa akunnernik tallimanik maanna kinguartippaat, ualeru nalunaaqutaq pingasunut aallartittussanngorlugu, Ujarak Jessen Heinrich, portørit sinnerlugit tusagassiutinut taama allappoq.
AAMMA ATUARUK Nuummi portørit tallimanngorpat suliaminnik unitsitsigallalersut
Napparsimmavissuarmi pisortanut naaperiaaneq matumani pissutaasoq taanna KNR-imut emailikkut ullaaq manna allappoq.
Pissutsit nalorninartut
Portørilli marlunngornermi nalunaarutigisaattut suliamik akunnerni sisamani unitsitsigallartoqarnissaa suli nalorninarpoq, Dronning Ingridimmi Napparsimmavissuani aqutsisut suliamut atatillugu qisuariaateqarsimapput.
Ujarak Jessen Heinrich taama oqarpoq:
- Maannakkut nangiarnartorujussuarmiileratta. Illuatungerisarput sakkortuumik qisuariarami, aamma taanna naatsorsuutigikannereerparput. Ingerlatiinassagutsigu soraarsitaanermik kinguneqarsinnaasoq imaluunniit mianersoqqussutimik, kisianni erseqqissumik taannginnamikku. Kisianni ippassaq (pingasunngornermi) ataatsimeeqatigigatsigu, aggersaramitigut qanoq piniarnersugut paasiniarlugu, Ujarak Jessen Heinrich oqarpoq, nangillunilu:
- Aalajangiusimaannarparput tamanna pisussaq, taava tassa nammineq asaffimmut saaffiginnissalluni oqaaseqarami. Taava aperaara asaffik suna? Sunaaffa pisortaqarfik pigaa. Taakku isumasioqqaarlugit. Taava ippassaq soraaliivilluta sinniisorput allagarsivoq unioqqutitsinerummanngooq kinguneqartitsisoqassasoq taama pisoqassappat, Ujarak Jessen Heinrich, Nuummi Dronning Ingridip Napparsimmavissuani portørit sinnerlugit ippassaq sisamanngornermi taama oqarpoq.
Peqqissutsimut Aqutsisoqarfik, portørillu kattuffiat SIK, Sermitsiaq.AG-mut pingasunngormat maajip ulluisa aqqaneq-aappaanni oqaatigaat sulinermik unitsitsigallarniarneq isumaqatigiissutinut atuuttunut unioqqutitsinerusoq.
Suliassat amerliartortut sulisut taakkuinnaasut
Portørit assigiinngitsorpassuarnik suliaqartarput, soorlu napparsimmaviliaanneqartussat napparsimmavimmiillluunniit angerlartinneqartussat angallattarlugit, tikittussat aallartussallu angallattarlugit.
Suliassallu amerliartuinnartut sulisut taakkuinnaapput.
Portørit tusagassiutinut taama nalunaaruteqarput.
Ataatsimiinnerup nalaani inuunermik navialisitsisut kisimi suliarineqassasut nalunaarummi aamma allaassimavoq.
