Peqqissaasut ernisussiortullu amerlineqarpata ernisunik toqqissisimanerulersitsissaaq

Ernisarfinni toqqissisimaneq annertunerusariaqarpoq.

"Naartusunik isumaginninnermut ernisussanillu kiffartuussinermut iliuusissanut pilersaarusiassatut siunnersuut" Naalakkersuisut sapaatit akunnerata siuliani saqqummiussaa taama anguniagaqarfiuvoq. 

Iliuusissat assigiinngitsut meerartaartussat, naartunermi, erninermi erninerullu kingorna atugaannut iluaqutaasussat siunnersuummi saqqummiunneqarput. 

Ilaatigut sineriammi ernisarfinni ernisussiortutut atorfillit pingasunik, peqqissaasutullu atorfillit aamma pingasumik amerlineqassapput. Taakku saniatigut nakorsanik immikkut ilisimalinnik marlunnik ernisussiortumillu ataatsimik, sineriammi ikiuullutik angalangaatsiartartussanik Nuummi atorfinititsoqassaaq.

Immikkoortortaqarfinni sulisut amerlineqarpata naartunermi erninermilu toqqissisimaneq annerulersissagaat Peqqissutsimut Naalakkersuisoq Agathe Fontain (IA) nassuiaavoq. 

- Taamaalilluta naartusut ajunnginnerusumik atugaqarnissaat angussavarput. Ernisussiortumit misissorneqartarnissaq erninerullu pilluarnermik misigisaqarfiunissaa anguneqassaaq, taanna oqarpoq. 

Sulisut amerlineqarpata meerartaartussat, naartunermi, erninermi erninerullu kingorna atugaannut pitsanngorsaataasussaassasoq, Agatha Fontainip oqaatigaa. Assi © : Johansinnguaq Olsen / KNR

Iliuusissatut pilersaarusiaq naapertorlugu suliniut ukiumut 7,7 millionit koruuneqassaaq. Aningaasat taakku 2024-mut Aningaasanut Inatsimmi ilanngunneqareerput. 

Sulisut isumaqataapput 

Sulisut peqatigiiffiisa peqqinnissaqarfimmi atorfinnik amerlisaanissamik pilersaarut isumatigaat. 

Peqqinnissaq Pillugu Kattuffiit (PKK) siulittaasuat Ken Jensen taama oqarpoq. 

- Ajunngilluinnarpoq. Atorfiit amerlinerisigut naartusunik sullissineq pitsaanerulersinnaavoq meeqqallu inunngortut aamma pitsaanerusumik sullinneqarlutik, taanna oqarpoq. 

- Sineriammi illoqarfinni nunaqarfinnilu isumassorneqarnissamik pisariaqartitsisut annertunerusumik isumassorneqarsinnaalernissaannik kinguneqarnissaa aamma ilimagaara. Amerlanerugaannimi suliaq oqinnerulertarpoq, imminnullu aamma isumasioqatigiissinnaallutik. Taamaammat suliniutitsialaasoraara. 

Atorfiit amerlinerisigut naartusunik sullissineq pitsaanerulersinnaasoq, meeqqallu inunngortut aamma pitsaanerusumik sullinneqalissasut PKK-ip siulittaasua Ken Jensen isumaqarpoq, Assi © : KNR

Sulisut amerlineqarnissaannik pilersaarut Ernisussiortut Kattuffiani siulittaasup Charlotte Bøgelundip aamma iluarisimaarpaa. Nakorsanik immikkut ilisimasalinnik marlunnik ikiuillutik immikkoortortaqarfinnut angalasartussanik Nuummi atorfinititsinissamik isumassarsiaq annermik isumaqataaffigaa. 

- Sulisumik amerlisaaneq pissanganarpoq. Sineriammi sulisussaaleqisoqartillugu piffissami sivikinnerusumi pisariaqartitsisunut sulisumik atukkiussisinnaaneq siunertaralugu Nuummi amerlisaanissaq annermik pissanganarpoq. Aqqiissutaalluarsinnaavoq, taanna oqarpoq. 

Sermersuaq qimussernerlu pilerisaarutitut naammanngillat

Amerlanerusunik atorfinititsinissaq isumaqataaffigineqaraluartoq imaaliallaannaq atorfinititsisoqarnissaa ilimananngilaq. 

Sulisussaaleqineq pissutigalugu ernisarfiit arlallit, ilaatigut Aasianni Uummannamilu matuneqareerput. Tamannalu aamma pissutigalugu Qaqortumi ernisarfik piffissami sivisujaami matuneqarallartarpoq. 

Taamaakkaluartoq sulisut amerlanerit atorfinitsinniarneqarnerata maanna iluatsinniisaa Peqqissutsimut Naalakkersuisup Agathe Fontainip qularinngilaa. 

- Atorfinititsiniarluta ilungersorpugut taamaaliortuassallutalu. Soqutiginnittoqalernissaa neriuutigiuarparput, taanna nassuiaavoq. 

- Peqqinneq pillugu isumaqatigiissusiatsinni sulisussarsiortartoqatigiit nukittorsarnissaat isumaqatigiissutigaarput, tamannalu sulisunik amerlanerusunik atorfinititsisoqarneranik kinguneqarniartussaavoq. 

Atorfinitsinneqartut amerlineqassappata annertunerusumik iliuuseqartoqartariaqartoq sulisut peqatigiiffii isumaqarput. Ilaatigut nutaamik pitsaasumik isumaqatigiissusiortoqartariaqarnerarpaat. 

- Piumasaqaatit ersarissorujussuupput. Isumaqatigiinniarnerit maanna ingerlasut ima iluatitsigalutik ingerlappata, sulisullu akissarsiami qaffasissusaannik naammagisimaarinnillutik sulinnaarusunneranik kinguneqarlutik, PKK-ip siulittaasua Ken Jensen oqarpoq. 

Isumaqatigiinniarnerit maanna ingerlasut iluatsinnissaata pingaaruteqassusaa Ernisussiortut Kattuffianni siulittaasup aamma naqissuserpaa. 

Sulisut amerlanerit pissarsiarineqassappata atorfeqareersullu annaaneqassanngippata, taava kalaallit peqqinnissaqarfiani akissarsiat sulinermilu atukkat danskit peqqinnissaqarfiannut unammillersinnaanissaat pingaaruteqarpoq. 

- Danmarkimi ernisussiortut isumaqatigiissutaat aningaasatigut iluatsilluarpoq. Danmarkimiillu sulisussarsisarnerput isiginngitsuusaagassaanngilaq, taamaammat atorfinititsiniarneq ajornarnerulissanngippat Kalaallit Nunaani akissarsiat danskit akissarsiaanut assingusariaqarput, taanna oqarpoq. 

- Sermersuaq, qimmit qimuttut savaateqarfiillu neqitsiullugit Danmarkimiit sulisussarsisinnaanerput naatsorsuutigisinnaajunnaarparput. Aningaasanik nassaartoqartariaqarpoq. 

Peqqinnissaqarfimmi sulisut isumaqatigiissutaat kingulleq marsip 31-ani atorunnaarpoq.