Peqqissaasut: Corona pillugu assororneq oqaatsinik kusanartunik aaqqinneqarsinnaanngilaq
Peqqinnissaqarfimmi pissutsit ilungersunartut ukkatarineqalernissaat pissutigalugu peqqissaasut coronamut suliniarnerup qanoq ilungersunartiginera tusagassiuutitigut saqqummiuppaat.
Assorortinneqarnerat ima annertutigilermat tamanna uninngasut pisariaqartitaminnik ikiorneqanngitsoortarnerannik maanna aamma kinguneqarpoq.
Petra Luna Fulgø, Dronning Ingridip napparsimavissuani peqqissaasoq sulisunullu sinniisoq pissutsit ilungersunarnerat pillugu ilaatigut oqaaseqartuuvoq.
AAMMA ATUARUK Peqqissaasut suaaruteqarput: Pissutsit nukinginnartooqqapput
Taassuma nunarsuaq tamakkerlugu tunillaassuuttoqarneranit ukiuni marlunni immikkut ittumik suliaqarnitik pillugit Peqqinnissamut aqutsisunit Naalakkersuisuniilu tusaaneqarnissartik amigaatigaa.
Taamaammat Peqqissutsimut naalakkersuisumut taartaasup aappaata Pele Brobergip (Naleqqaq) peqqissaasut pillugit iliuuseqarusulluni saqqummernera ippassaq atuakkani nuannaarutigaa:
- Tusarneqarnerput ajunngilluinnarpoq, uggornalaaginnarporli kingusissukkut aatsaat taamatut qisuariartoqarnera, malunnarporli pissutsit atukkagut pimoorullugit paasineqarsimanerat, Petra Luna Fuglø oqarpoq.
Peqqissaasoq: Misissuinermi periuseq nutaaq uatsinnut allannguinngilaq
Ilungersuaneq qasukkaaminiarlugu taamaalillunilu pissutsit uninngasunut tuttannginniassammata Naalakkersuisut misissuinermi periutsimik allannguinissaq aalajangerpaat, tamanna Pele Brobergip KNR-imut sisamanngormat oqaatigaa:
- Inersuussutit malillugit allannguereernikuuvugut, takoriissajunnarsivarsi testererujunnersuaq qimanniarsarigipput, taamaalillugu peqqinnissaqarfimmiittut napparsimasut piffissaqarfigineqarnisaammata, Pele Broberg oqarpoq.
AAMMA ATUARUK Pele Brobergip peqqissaasut ilungersortut qujassuteqarfigigai
Kisianni napparsimmavissuarmi nakorsaatinut immikkoortortaqarfimmiittunut Petra Luna Fulgømut suleqataanullu, allaannguut taanna isumaqarpallaanngilaq:
- Massakkorpiaq tuniluunneq sakkortunerpaaffissaminiippoq, soorunamilu napparsimavimmut unittut amerlipput. Uanga coronamik tunillanneqarsimasut uninngavianni sulisuuvunga, taamaattumik teterinermut periuseq nutaaq uagutsinnut malunnarnavianngilaq, Petra Luna Fuglø oqarpoq.
- Unittut amerlinerat sulinitsinnut sunnerneqaatigaarput. Inissakilliorneq pilerpoq, siniffinnut mattusimallutik uninngaffiusussanut inissat naammappat? Qanorlu iliorluta covid-19-mik eqqugaasimasut uummalluttullu assigiimmik ikiussavagut?
Petra Luna Fuglø ernumassutaasa ilaat tamakkuupput.
Taassumali misissuinermi periuseq nutaaq misissuisarfimmi misissueqqissaartarfimmilu sulisunut oqilisaataasinnaanera uppernaa.
Oqaatsit kusanartut iliuuseqarnermik malitseqassasut
Peqqissaasut Kattuffiannit Pele Brobergip nalunaaruteqarnera aamma nuannaarutigineqarpoq, taakkuli oqaatsit kusanartut iliuuseqarnermik aamma malitseqarnissaat neriuutigaat.
- Naalakkersuisumit pisortatigoortumik qujassuteqarneq isumaqartorujussuuvoq. Pingaartumik peqqissaasut suliaanik qujaniarnermut pikkorippaarsimannginnerup nassuerutigineqarnera pillugu, siulittaasoq, Ken Jensen allappoq.
- Qujassuteqarnerli ilungersunartorsiornerup nalaani iliuuseqartoqannginnerani naleqarnavianngilaq. Qujaneq uninngasunut qulakkeerinavianngilaq. Qujaneq peqqinnissaqarfimmi sulisut sulinermi atugassarititaanut sulisoqarnissamullu qulakkeerinavianngilaq.
Peqqissaasut immikkut sulinngiffeqarnissamik neqeroorfigineqarnissaat siunnersuutigaa, peqqissaasut taamaalillutik coronamik akiuiniarnermi immikkut ittumik suliaqarnissamut anersaartorfissaqartinneqarlutillu nukissanik katersissapput.
Pele Brobergip kissaateqarneq paasisinnaavaa, neriorsuisinnaananili. Taassumalu sulinermut 2024-mi isumaqatigiinniarnissat innersuussutigai.
Ken Jensenilli pissutsit maanna aaqqiivigineqanngippata peqqissaasorpassuit suliaminnit qimarrannissaat ernumassutigaa:
- Isumaqatigiinniarnissat tullissaanut utaqqinissaq piviusunngornavianngitsunik takorluuineruvoq. Maannakkut alloriartoqarnianngippat tullissaanut isumaqatigiinniarnissamut peqqinnissamut sulisorpassuaqarnavianngilaq.
