Petra Luna Fuglø.

Peqqissaasut suaaruteqarput: Pissutsit nukinginnartooqqapput

Peqqissaasut coronap peqqinnissaqarfimmik tatisinera ernummatigaat. Sulisut napparsimasullu eqqugaapput. Massakkut pisortat tusaaniarnissaat neriuutigaat.

- Suaarutiginninninni kissaatigigaara pissutsit pitsaanerulernissaat. Arlaannik isornatorsiuiniaannanngilanga. Taamaallaat arlaannik pisoqarnissaa kissaatigaara.  

Taama oqaseqarpoq Petra Luna Fuglø, Nuummi Dronning Ingrids Hospitalimi medicinsk afdelingimi sulisut sinniisuat aamma peqqissaasoq.

Ken Jensenimit Peqqissaasut Kattuffianni (PK) siulittaasuusumit taperserneqarpoq.

- Oqaloqatigiinneq siumut aqqutissaasutut isigaara. Kisianni oqaloqatigiittoqanngippat tusagassiuutitigoortariaqarpugut.

Ukiuni marlunngulersuni nunarsuarmi tunillaassuunerup ingerlanerani peqqissaasut tamanut ammasumi nipaassimapput. Massakkulli nipaarsaarunnaarput peqqinnissaqarfimmi pissutsit pitsaanerulernissaat neriuutigalugu, isumartik naapertorlugu peqqinnissaqarfik nukinginnartooqqasumiimmat.  

Suleqatimik qimarrannissaat ernummatigaat 

Peqqissaasut misigisimavaat malittarisassanik nutaanik, ullormiit ullormut allanngortineqartartunik, isummerfissaqartuartarlutik. Sulisut immikkortut akornannut nuuneqartarput, suliffissat ullormiit ullormut pilersaarusiorneqartarput, taamalu ilaqutariittut/inuttut inuunerup ataqatigiinnissaa ajornakusoorluni.  

Petra Luna Fuglø naapertorlugu taamatut inuunerup allanngorartuartup kingunerisaanik suleqataasut aalajangiusimaannarnissaatajornakusoorneulersimavoq, sulisut nutaat taartaasullu sulianut iluamik nassuiaanneqarsinnanngimmata.   

- Inuit qanoq sivisutigisumik atasinnaanerat ingerlanerup pitsaanngitsup aalajangertarpaa. Periaatsinik journalimut atuinissamik ilinniartitsisoqartarpa, aamma mattusersuinermut atortut sumiinnerat ilikkarneqartarpa? Tamakkualunnguit pillugit nukissat atorneqassanngippata taava sinneqartooruteqarnerulersarpoq suliartornissarlu pilerinarnerulertarluni.

Petra Luna Fuglø oqaluttuarpoq suleqatini annaasarsimallugit atorfimminnit tunuartarmata suliassaqarpallaarneq peqqutigalugu aamma misigisimagamik naammattumik ilinniartinneqarsimanatik.  

Napparsimasunik katsorsaaneq ajornerulerpoq 

Ken Jensen, PK-mi siulittaasuusoq nassuiaavoq, taama annertutigisumik tatisineq aamma napparsimasunut kinguneqartoq.

Kalaallit Nunaanni peqqinnissaqarfik Danmarkimit taartaasunik pisariaqartitsilluinnarpoq, kisianni Kalaallit Nunaanni Danmarkimilu napparsimmaviit assigiinngeqaat. Taamaattumik taartaasut kulturimut, it-kkut atortorissaarutinut nalinginnaasumillu suleriaatsinut nutaanut ilinniartinneqaqqaartariaqarput.

- Taamaattoqanngikkaangat kingunerisinnaavaa napparsimasunut sulinerit ajornerulernerat, Ken Jensen oqarpoq.

Assersuutigalugu oqaluttuarpoq peqqissaasut ilaat oqartut napparsimasut jounaliinik immersuinissaq pifissaqarfigineq ajorlugu. Tamatuma kingunerisinnaavaa suliartortut tulliit napparsimasup qanoq iliorfiginissaa imaluunniit nakorsaatissaa ilisimasinnaangimmassuk.

Aamma oqaluttuaraat coronamut immikkoortoqarfimmi sulisut napparsimasut ajornartorsiutigisinnaasaannik ilinniartinneqarneq ajortut, PK-lu naapertorlugu ajornerpaaffiani inuunermik akeqaratarsinnaavoq.  

- Ilaasortanik ullumitut kingusitsigisumik oqaloqateqarpugut Dronning Ingrisa Hospitalimi pissutsit kipiluttunartut pillugit, Ken Jen PK-mi siulitaasoq, oqarpoq.

Peqqissaasumillu Petra Luna Fuglømit taperserneqarpoq.

- Ullut ilaanni sulereerluni angerlaraanni eqqarsarnartarpoq ’piffissaqarnerunissara kissaatiginaraluaq’. Kisianni qaangiinnasoqartariaqartarpoq. Tassaasinnaavoq assamminik iluamik asatsisimanngitsup kukiinik saliineq. Sualuarunnguusorineqarsinnaavoq, kisianni napparsimasut ataqqinassusaannut pingaaruteqarpoq, oqarpoq.  

Oqaloqatigiinneq akuerisaanerlu maqaasivaat

Petra Luna Fugløp imaluunnnit Ken Jensenip Peqqinnissaqarfimmi pisortaasut imaluunniit Peqqinnisaqarfimmut Aqutsisoqarfik  isornartorsiorniaannanngilaat, kisiaani tusagassiuutinut saaffiginninnissartik toqqarsimavaat allatut maluginiarneqarnissaminnut periarfissaarussimasutut misigisimagamik.

- Suleqataasut tusarneqanngillat. Ineriartorneq unittoorsimavoq, maluginngitsuukkallu suleqataasunut pingaaruteqaraluartut amerlaqaat. Tusarneqarnermik misigisimaneq naleqartumik pingaaruteqarpoq . Tunniusimanermut, naammaginnisimaarnermut, aamma suliffimmiiginnarnissamut pingaaruteqarluinnarpoq, Petra Luna Fuglø oqarpoq.

Aamma Ken Jensenimut oingaaruteqarpoq PK-mi ilaasortai sulinermikkut tunniussaminnut annertunerusumik akuersaarutigineqarnissaat.   

- Maassakkullu tatisineq annertooq takkuteqqippoq, immikkulu ittumik sulisariaqarluta. Pisortaasuniit oqaloqatigiissutissatut qaqinneqanngilaq, Soorlumi imaattoq ’taannamiuna suliassaat’, taamaakkaluarpormi, kisianni taama sivisutigisumik tatineqarsimagaanni pisariaqartinneqartarpoq ajunngilljuinnartumik sulisimanermik ilisimatinneqassalluni.

Ken Jensenip siunnersuutigaa peqqissaasut assersuutigalugu ullut immikkut sulinngiffissat neqeroorfigineqassasut, qasuersaarniassammata nukissaqaleqqillutillu coronamut akiuunnermi ajugaassutaasariaqartumik immikkut ittumik suleqqinnissaminnut.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl