Peqqissaasoq tuluk ungaavaqqanik toqutsisimasutut inuunini naallugu parnaarussaasoq

Peqqissaasoq tuluk Lucy Letby inuunermi sinnerani parnaarunneqartussanngorpoq ungaavaqqanik arfineq marlunnik toqutsisimasutut arfinilinnillu allanik toqutseriarsimasutut pillarneqaatissinneqarami.

Manchesterimi eqqartuussisoq taama ataasinngornermi aalajangiivoq.

Letby ungaavaqqanik arfineq marlunnik toqutsisimasutut arfinilinnillu allanik toqutseriarsimasutut tallimanngormat pisuutinneqarpoq.

Pinerlunnerit Englandip avannaata kitaani Countess of Chester Hospitalimi juuni 2015-imiit juuni 2016-ip tungaanut pinerluutigineqarput.

Peqqissaasoq 33-nik ukiulik Manchesterimi eqqartuussivimmi ataasinngornermi najuutinngilaq.

Ungaavaqqat Letbymit toqunneqarsimasutut toqoriarneqarsimasutulluunniit eqqartuunneqartut ilai siusippallaamik inunngorsimapput.

Pineqaatissiinermik uuttuinermi eqqartuussisup pingaartippaa Letbymit pinerlineqartut tassaammata inunni sanngiinnerpaanut ilaasut.

Chester Hospitalimi inoorlaat akornanni ilungersunartumik nappaateqalersut imaluunniit tassanngaannartumik anersaartornermik ajornartorsiuteqalersut 2015-imi 2016-imilu amerleriarujussuarnerat nalunaarsorneqarput.

Letby sulisuni ksiartaalluni pisuni taakkunani nakorsanit pissusissamisuunngitsutut isigineqartuni tamani najuussimavoq.

Ungaavaqqat kapuummik silaannarmik taqaannut naavisigulluunniit kapillugit imaluunniit immuttortippallaarlugit napparsimalersippai, allat nakuuserfigineqarlutik imaluunniit insulinimik toqunartulersorneqarlutik.

Periaatsit inoorlaanut anniarujussuarnermik pilersitsisut suliami eqqartuussisup tikkuarpaa.

Lucy Letby pisuunnginnerarsimavoq oqarsimallunilu inoorlaat taakku ajoqusersimanagit.

Angerlarsimaffianilli politiit siornatigut misissueqqissaarneranni assammik allattukkat nassaarineqarput ilaatigut allassimasut "Taamaaliorama ajortuuvunga ".

Allattukkat taakku peqqissaasumut uppernarsaatinut ilaapput.