Peqqinnissaqarfimmi sulisut akerliupput: Eqqartuussivimmut suliassanngortitsinissaq siorasaarutigigaat

Peqqinnissaqarfimmi sulisut Danmarkimukarnerminni coronamik tunillatsissimagunik akissarsiaannillu ilanngaassivigineqassappata taava Namminersorlutik Oqartussat eqqartuussivimmut suliassanngortinneqarsinnaapput.

Peqqinnissaq pillugu kattuffimmi, PPK-mi siulittaasoq, Ken Jensen tusagassiuutinut nalunaarummi allappoq.

Namminersorlutik Oqartussat aqutsisuisa sulisunut mailikkut sapaatip akunnerani matumani nassiussaqarnerisa kingorna sakkortuumik taama nalunaaruteqarpoq.

Mailimi tassani nunatta avataani coronavirusimik tunillatsikkaanni taava napparsimanerup nalaani akissarsiassanik ilanngaatsiteratartoqarsinnaasoq allassimavoq. Nunattami avataanut maannakkut angalanissaq ”peqqarniitsumik mianersuaalliornerusoq” tassani tunngavilersuutigineqarpoq.

AAMMA ATUARUK Nunatta avataani coronamik tunillatsinneq? Akissarsiassannik ilanngaatseratarsinnaavutit

Peqqarniitsumilli mianersuaalliornertut” isumasiorneqarnera PPK-mi isumaqatiginngilluinnarneqarpoq.

- Napparsimaneq napparsimaneruvoq, ilaasortagullu napparsimanerminni akissarsiaqarsinnaasut napparsimagunik, Covid-19-imut attuumassuteqartumik attuumassuteqanngitsumilluunniit napparsimagunik akissarsiaqarsinnaatitaapput, Ken Jensen tusagassiuutinut nalunaarummi allappoq.

Suliatigut peqatigiiffiit qassiiusut akerliuniartut

Taassuma sulisut sumik napparsimassuteqarnerminnik sulisitsisuminnut ilisimatitsissuteqarnissartik pisussaatitaaffiginngikkaat innersuussutigaa.

Kattuffiup tamatuma saniatigut Namminersorlutik Oqartussat PPK-mi ilaasortat napparsimanerannut atatillugu apeqquteqannginnissaat naatsorsuutigalugu erseqqissaatigaa.

Namminersorlutik Oqartussat sulisunit coronamik tunillatsissimasunit akissarsiassanit ilanngaassiniarunik taava kattuffik eqqartuussivimmut suliassanngortitsissasoq, Ken Jensen oqarpoq.

AAMMA ATUARUK Corona pillugu aqutsisoqarfik: Danmarkimut angalanissaq isumatsialaannginnerpaavoq

Kattuffiup siulittaasuata Namminersorlutik Oqartussat sulisunut nalunaarumminnik erngertumik utertitsinissaat kaammattuugaa.

KNR-ip nunatsinni Danmarkimilu sulisut peqatigiiffii allat attaveqarfigai, taakkunanngalu Danmarkimut angalanissap ”peqqarniitsumik mianersuaalliorneragaanera” aamma isumaqatigineqanngilaq.

Nunatsinni ilinniagartuut kattuffiata siulittaasuata, Anette Bojsenip oqarnera naapertorlugu ataatsimoortumik nalunaaruteqartoqarumaarpoq.