Nunatta avataani coronamik tunillatsinneq? Akissarsiassannik ilanngaatseratarsinnaavutit
Nunatta avataaniitsillutik coronamik tunillatsissaguit napparsimanivit nalaani akissarsiassannik ilanngaatseratarsinnaavutit.
Nunattami avataanut maannakkorpiaq angalanissaq ”peqqarniitsumik mianersuaalliornerusoq”, Hans-Peder Barlach Christensen Namminersorlutik Oqartussani sulisunut mailikkut paasissutissiivoq.
Taanna Corona pillugu aqutsisoqarfimmi siulittaasuullunilu Naalakkersuisut siulittaasuata naalakkersuisoqarfiani siulittaasuuvoq.
AAMMA ATUARUK Corona pillugu aqutsisoqarfik: Danmarkimut angalanissaq isumatsialaannginnerpaavoq
Taassuma mailip imarisai KNR-imut uppernarsarpai.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
- Sulialli naliliiffigineqartuaannassasut erseqqissassallugu pingaaruteqarpoq, taanna oqarpoq.
Taannali pisuni sorlernit sulisup akissarsiassaminit ilanngaatsittariaqarneranut assersuuteqarusunngilaq, kisianni:
- Nalunaaruteqarnermi pisariaqarluinnarnerani aatsaat aallartoqarnissaanik innersuussuteqarneq tunngavigineqarpoq, Hans-Peder Barlach Christensen oqarpoq.
"Sakkortuumik mianersuaalliorneq "
Mailimi ima allassimavoq:
”Sulinngiffeqarnissamut pilersaarutit qaangiunneranni suliartoqqinnissaq angalasup nammineq akisussaaffigaa. Covid-19-ip kingunerisaanik kinguaattoornerit tamarmik nammineq akisussaaffigineqarput, taakkulu sulinngiffeqarnisssamit, qaangiuttoornermit taasiullugu sulinngiffeqarnissamut akunnernit akissarsianillu ilanngaatsitinnikkut matussuserneqassapput. Tassunga ilaapput assersuutigalugu timmisartumi kinguaattoorneq imaluunniit corona pillugu oqartussani ulapputtoqarnera pissutigalugu misissortinnermi tunillatsissimannginnerup uppernarsarneqarsinnaannginnera ilaalu ilanngullugit”.
”Aamma sulisut nunatta avataani covid-19-imik tunillatsissimagunik napparsimanermi akissarsiaqartinneqarnissaq naatsorsuutigineqassanngilaq, angalanermi sakkortuumik mianersuaalliornertut isigineqassammat.”
AAMMA ATUARUK Tamaat isigalugu: Coronavirus pillugu killiffik
Hans-Peder Barlach Christensenip oqarnera naapertorlugu nalunaaruteqarneq maanna – atuukkunnaarnissaatalu tungaanut atuutissaaq.
- Danmarkimi maanna tunillaassuuttoqangaatsiarpoq, siulittaasoq oqarpoq, tusagassiortunullu sisamanngornermi ilisimatitsinermi oqariartuutini uteqqillugu:
Danmarkimi coronamik misissuisarfinni utaqqisariaqartarneq pissutigalugu coronamik misissortinnerup Kastrupimi timmisartumut ikinissamut angumersisinnaanissaa taamaammat qulakkeerneqarsinnaanngilaq. Timmisartumummi ilaaniaraanni misissortinneq ullunik tallimanik sivisunerpaamik pisoqaassuseqassasoq malittarisassaavoq.
Sulisup iliuusereqqunngisarput malinngippagu taava uagut tamanna akisussaaffigisinnaanngilarput.
Air Greenlandip Napparsimmavissuarmut timmisartumut ilaasussat aallannginnerminni ullut marluk sioqqullugit misissortissinnaanissaannut isumaqatigiissutaata ingerlaannarnissaa Danmarkimi tunillaassuuttoqangaatsiarneq pissutigalugu ingerlatiinnarnissaa aamma qulakkeeqqanngilaq: Statens Serum Institut naapertorlugu akunnerit 24-t kingulliit tunillatsissimasutut Danmarkimi uppernarsarneqartut 2992-iupput.
Inuit namminneq akisussaaffigigaat
Inuit nunatta avataani coronamik tunillatsissimappata akissarsiaannit ilanngaannissaannut pisinnaatitaavisi?
- Aqutsisutut pisinnaatitaaffik malillugu taamaaliorsinnaatitaavugut. Sulisup iliuusereqqusarput malinngippagu taava uagut tamanna akisussaaffigisinnaanngilarput. Tassa sulisoq sakkortuumik inassutigisaqartugut ilisimallugu iliuuseqaannaruni, Hans-Peder Barlach Christensen oqarpoq.
Timmisartoq decembarip 20-ani nunatsinnukartussaq taamaatinneqarpoq, timmisartorlu nunatta Danmarkillu akornanni decembarip 21-ani 22-anilu angalasussaq aamma taamaatinneqarpoq.
AAMMA ATUARUK Kangerlussuarmi coronamik tunillatsissimasoqartoq
Nunatsinnut juullikkunni tikittut angerlarsimaannaqqusaanermut piffissaliussaq ullunik tallimanik sivisussuseqartoq unioqqutissagaat Namminersorlutik Oqartussanit ernummatigineqarpoq, Namminersorlutik Oqartussallu inuit juullikkunni januaarimilu angalasoqannginnissaanut amerlasooriarlutik kaammattuuteqarfigaat.
Angalasussat qanoq amerlatigisut taamaatitsiinnarsimanersut KNR-imit paasissutissarsiarisinnaanngilarput.
Hans-Peder Barlach Christensenip aamma kisitsisaatiginagu oqaatigaa, ”ikinneruleriartortulli angalasussaanerarpai”.
- Angerlarsimaannarniarlutik aalajangertut nersualaarneqassapput, siulittaasoq oqarpoq.
Coronamik tunillatsissimasutut nunatsinni uppernarsarneqarsimasut 19-iupput. Taakkunannga – ataaseq Kangerlussuarmiittoq minillugu – peqqisseqqittutut nalunaarutigineqarnikuupput.
