Kangerlussuarmi coronamik tunillatsissimasoqartoq
Kangerlussuarmi COVID-19-imik tunillatsissimasoq ataaseq paasineqarpoq.
Tunillatsissimasoq nunanit allanit timmisartumut ilaasartaataanngitsumut ilaalluni Kangerlussuarmukarsimavoq.
Nunatta nakorsaanera Henrik L. Hansen taama paasissutissiivoq.
Tassalu Danmarkimit timmisartorsuarmut ilaalluni nunatsinnut tikinngilaq. Nakorsaanerup tunillatsissimasoq qanoq inuiaassuseqarnersoq paasissutissiissutigerusunngilaa, tunillatsissimasorli angalasunut allanut qanillisimanngilaq. Pineqartoq Kangerlussuarmiiginnarsimavoq nunatsinnilu allamiissimanani.
Tunillatsissimasoq timmisartumut nunamit allameersumit ilaalluni Kangerlussuarmut tikissimavoq, taamaattumik angalasunut allanut attaveqarsimanngilaq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Tunillatsissimasoq ulluni Kangerlussuarmiissimanermini angerlarsimaannarsimavoq. Nakorsaaneqarfiup maleruaqqusai naapertorlugit taama pisoqarpoq, taamaattumik pisoq nakkutigineqartoq, Kangerlussuarmilu pingaarutilimmik tunillaassuuttoqarnissaa aarlerinaateqanngitsoq nalilerneqarpoq.
- Danmarkimi nunarsuarmilu tunillaassuunneq taama annertutigitillugu, ilimagisariaqarpoq COVID-19-imik tunillatsissimasut tikittarnissaat. Inuiaqatigiinni pingaarutillit tamaasa ingerlanneqarnissaat, inuiaqatigiit tamarmik peqqissusaannik eqquinani, tassuuna mianersortuartoqarlunilu nalilersuisoqartuarpoq, Nakorsaaneq Henrik L. Hansen oqaaseqarpoq.
Kingullermik Aasianni tunillatsissimasoqartoq
Nunatsinni tunillatsissimasumik novembarip ulluisa aqqarnganni kingullermik paasinnittoqarpoq.
Aasianni tunillatsissimasoqartoq taamani paasineqarpoq.
Nunatsinni tunillatsissimasut katillutik maanna 19-iulerput. Illoqarfiit tunillatsissimasoqarfiusut tassaapput, Nuuk, Aasiaat maannalu Kangerlussuaq.
AAMMA ATUARUK Coronap ilaqutariit juullisioriartinniarunnaarai: Angajoqqaakka qangali takuagut
Aamma umiarsuarmi ilisimatusaammi inuttaq tunillatsissimasoq Nanortalimmi aasaq paasineqarpoq.
Danmarkimili tuniluuttoqarneruvoq. Taamaammat kommunini 38-ni meeqqat atuarfianni 5. klassimit angajullernut atuartut angerlarsimanissaat danskit naalakkersuisuisa aalajangerpaat.
Kommunini taakkunani filmertarfiit, neriniartarfiit, isiginnaartitsisarfiit imerniartarfiillu jannuaarip ulluisa pingajuannut matuneqarput.
Danmarkimilu tunillaassuuttoqarmat, Air Greenlandip KIøbenhavnimit nunatsinnut decembarip ulluisa 20-nni, 21-anni 23-annilu timmisartuussinissat taamaatippai.
AAMMA ATUARUK Coronap ernumatiginera: Juullimut timmisartuussinissaq allanngortinneqartoq
Danmarkillu nunattallu akornanni juullikkunni angalasussat amerlapput.
Nakorsaanerup Henrik L. Hansen oqarnera naapertorlugu nunatsinnit inuit 2500-it missaanniittut juullinnginnerani aallarniarput. Ikinnerulaarut nunatsinnut juullinnginnerani tikissapput.
Nunatta nakorsaanera Henrik L. Hansen juullikkunni angalannginnissamik kaammattuisaqattaartarpoq.
- Danmarkip nunattalu akornanni juullip ukiortaallu akornanni angalasussat aarlerinarnerpaapput. Nunarsuarmi tamarmi immikkut ilisimasallit tamarmik juullikkut eqqarsarnartoqartingaatsiarpaat. Juullikkunni tunillaassuuttoqalernissaa ilimanangaatsiarpoq, Henrik L. Hansen tusagassiortuni sapaatit akunnerata siuliani katersortitsinermi oqarpoq.
