Coronap ilaqutariit juullisioriartinniarunnaarai: Angajoqqaakka qangali takuagut
Nunatta Danmarkillu akornanni juullinngitsiarnerani angallattoqarnavianngilaq.
Nunatta nakorsaanerata peqqissutsimullu naalakkersuisup coronap juullimi tuniluunnissaa ernummatigalugu, angallannissat Air Greenlandimut taamaateqquai.
Ilaqutariit Davidsenikkut Aasiaanniit Danmarkimut juullisioriartussaagaluit taamaatitsisariaqarsimapput.
- Angajoqqaakka Danmarkimut nuunnikuummata, juullisioriarfigisussaagaluaratsigit.
Linda Davidsen taama oqarpoq.
Taassuma ilaquttani, tassa uini meeqqatillu marluk arfinilinnik aqqaneq marlunnillu ukiullit ilagalugit, Danmarkimut Herlufmaglemut Næstvedip eqqaaniittumut juullisioriartussaagaluarput.
- Soorunalimi peqqussutit saqqummiullattaalermagit, pissanganaqqaarpoq pakatsinaqqaarlunilu sivisuumik takunikuunagit takunngitsuulerunarlugit uppernarsiartorlugu.
Linda Davidsen taama oqarpoq.
Nunarsuaq tamakkerlugu coronap tuniluunnera peqqutigalugu Nunatta Danmarkillu akornanni pisariaqanngitsumi angallannissaq siusinnerusukkulli pisortanit innersuussutigineqanngilaq.
Taamaakkaluartoq Davidsenikkut decembarip 22-ani juullisioriarlutik aallarnissartik naatsorsuutigigaluarpaat.
Oqartussalli innersuussereersut taakku aallarniarunnaarput.
- Akisussaaffimmik tiguseqataalluta, peqqussutinik malinnilluta uniinnarpugut.
Angalanissap ullui allanngortinneqarsinnaanerannik Air Greenland neqerooruteqaraluarpoq, Linda ilaqutanilu aallarniarnatik aalajangerput.
- Meeqqat paaseqqaaramikkit aallaqqaammut pakatseqqaarput. Kisianni takusinnaajartorpaat, naggataatigullu akueralugu.
- Takusinnaajartoratsigut aamma uagut sissueraluarlutaluunniit risiko tassaniittoq, taamaammat aamma taanna ernummatigisatsinnut ilaavoq.
Ilaqutariit Aasianni ilaquttatik peqatigalugit juullisiorniarlutik aalajangerput.