Peqqinnissaq pillugu ataatsimiititaliarsuaq: Nutarsaanissamut sanaartornissamullu 800 millionit koruunit pisariaqartinneqarput
Peqqinnissaqarfinnik aningaasameerpoq. Peqqinnissaqarfinni nutarsaanissanut, nutaanik sanaartornissanut atortorissaarutinillu nutaanik pisariaqartitsineq annertuvoq.
Peqqinnissaq pillugu ataatsimiititaliarsuup tusagassiortunik sisamanngormat katersortitsigami taama oqariartuuteqarpoq.
Peqqinnissaq pillugu ataatasimiititaliarsuaq Suleqatigiissitsisut 2019-imi ukiakkut ataatsimiinnermi siunnersuuteqarneranit pilersinneqarpoq, taamani Inatsisartuni amerlanerussuteqangaatsiartut tapersiipput.
Coronap ataatsimiititaliarsuup suliaqarnissaa kinguartippaa. Paasissutissanik katersineqarneq pingaartumik coronamik kinguartoortinneqarpoq.
Ataatsimiititaliarsuup nuna tamakkerlugu anganissaa pilersaarutaagaluarpoq, maannamulli Kommune Kujallermut Avannaata Kommunianullu kisimi angalasimavoq.
Ataatsimiititaliarsuaq Kommune Qeqertalimmukariartoraluarpoq, coronali pissutigalugu utiinnartariaqarluni.
Nalunaarusiaq innersuussutinik imaqartoq Inatsisartunut tunniunneqarnissamut ukioq manna kingusinnerusukkut piareertussaavoq.
Nunamut tamarmut napparsimmavik, Sisimiuni pilattaavik nutaaq napparsimasunut akunnittarfiit nutaat.
Peqqinnissaqarfimmi pitsanngorsagassatut kissaatit amerlapput. Atortut, nutarsaanerit illorsuillu nutaat sanaartugassallu pisariaqartinneqartut
Peqqinnissarlu pillugu ataatsimiititaliarsuarmeersut suliami qiterpaarnerani saqqummiigami oqarput.
- Atortutigut illutigullu massakkuugallartumik peqqinnissaqarfik 800 millionit sinnerlugit nutarteriffiginngikkuni nutaaliorfiusariaqarpoq, eqqartuussiissuserisoq Ulrik Blidorf oqarpoq. Taanna peqqinnissaq pillugu ataatsimiititaliarsuarmi siulittaasuuvoq.
AAMMA ATUARUK Peqqinnissaq pillugu ataatsimiititaliarsuaq: Sulisut taarseraannerat tupaallannarnerpaavoq
Peqqinnissaq pillugu ataatsimiititaliarsuup, Naalakkersuisunit pilersinneqartup, nalunaarusiani ukioq naatinnagu naammassissavaa.
Peqqinnissaqarfik qanoq ililluni maannarnit pitsaanerulersinnaanersoq taakkua misissorpaat.
Ataatsimiititaliarsuup suliamik qiterparnera sapaatit akunnerisa siuliani saqqummiuppaa. Peqqinnissaqarfillu imaaliallaannarlugu pitsanngorsaavigineqarsinnaanngitsut paasinarsivoq.
- Aningaasaqarnermut tunngasoq suliassatsinnut ilaanngikkaluarpoq, nutarterinissat atortunik kiisalu napparsimmaviit illutaannik nutarterinissanut tunngasut, Ulrik Blidorf tusagassiortunik marsip 24-ani katersortitsigamik oqarpoq.
AAMMA ATUARUK Peqqinnissaq pillugu ataatsimiititaliarsuaq siullermeertumik ataatsimiittoq
Nuummi nuna tamakkerlugu napparsimmavimmik pilersitsinissamut 489 millionit koruunit pisariaqartinneqarput, Sisimiuni pilattaavimmik ernisarfimmillu nutaanut 35 millionit koruunit Ilulissani nakorsianullu akunnittarfimmut nutaamut 27 millionit koruunit.
- Tulleriissaarinermut qinikkat, tassa Inatsisartut Naalakkersuisullu, taanna ikkuttariaqarpaat, Ulrik Blidorf oqarpoq.
Peqqinnissaq pillugu ataatsimiititaliarsuup killiffissiorlutik saqqummiimmata, Naalakkersuisut politikikkut maanna iliuuseqarnianngitsut, peqqinnissaq pillugu naalakkersuisoq oqarpoq.
- Maannamuugallaq tusaatissatut tiguagut. Ukiup naajartornerani nalunaarusiaq saqqummiuttussaavaat, tassanilu politikikkut aatsaat iluamik eqqartulissavagut nalunaarusiami angusimasaat, Kirsten L. Fencker taama oqarpoq.
Peqqinnissaq pillugu ataatsimiititaliarsuup nalunaarusiaa pilersaarut naapertorlugu ukiup naalernerani naammassissaaq.
Peqqinnissaqarfiit pitsanngorsaavigineqarnissaannut aningaasaliisoqassappat Inatsisartut siusinnerpaamik aappaagu upernaakkut ataatsimiilerpata oqaluuserineqassasut Kirsten L. Fencker oqarpoq.
