Qujaukitsoq: Peqqarniisaarniartoqartarnera Nunatsinnut qanillivoq
Londonimi saassuussineq, politiit peqqarniisaarniarnertut aallaqqaataaniilli naliligaat, Vittus Qujaukitsup annilaarnarnerarpaa.
- Taamatut pisoqartillugu annilaarneq qisuariaatissatuaagunarpoq, nunanut allanut naalakkersuisoq KNR-imut taama oqarpoq.
Tuluit inatsisartoqarfiata Londonimiittup eqqannguani inuit tallimat toqutaaffigisaannik ikinnerpaamillu 40-t ikiligaaffigisaannik pisoqarnerata peqqarniisaarnianit piliaanera, Tuluit Nunaata premierministeriata Theresa Mayip pingasunngormat unnukkut uppernarsarpaa.
Saassussineq peqqarniisaarniarnertut politiinit paasiniaaffigineqartoq, Belgiap illoqarfiisa pingaarnersaanni Bruxellesimi inuit 32-t toqutaaffigisaannik peqqarniisaarniartoqarneranit ukioq ataaserluinnaq qaangiuttoq pivoq.
AAMMA ATUARUK Vi føler med London
Europa ukiuni kingullerni marlussunni arlaleriarluni aassunneqisunik peqqarniisaarniarfigineqartarpoq, taamaammat Vittus Qujaukitsoq naapertorlugu kalaallit eqqugaasinnaanerat aamma qanilligaluttuinnarpoq.
- Peqqarniisaarniartoqartarnera inuunitsinnut qanillagaluttuinnarpasippoq. Takusinnaavarput Europami peqqarniisaarniartoqartarnera Nunatsinnut qanilligaluttuinnattoq, taamaattumillu kalaallit tamakkunannga eqqugaasinnaanerat aamma qaninnerulerpoq.
Toqutaasut ikiligaasullu kalaalertaqannginnerat Vittus Qujaukitsup ilisimatitsissutigaa. Naqissuserpaali taamatut pisoqareernerani peqqarniisaarniartoqaqqissinnaanera annertunerusoq, taamaattumillu nunatsinni innuttaasut tamaasa kajumissaarpai silarsuarmi sumulluunniit angalassagaluarunik mianersoqqullugit.
- Angalanissaq inerteqqutigineqanngilaq, silarsuarmili arlaannut angalassagaanni soorunami sissueqqissaarnissaq eqqaamaneqartariaqarpoq. Taamaammat kalaallit tamaasa kajumissaarusuppakka imminnut paarilluaqqullugit, nunanut allanut naalakkersuisoq Vittus Qujaukitsoq KNR-imut taama oqarpoq.
AAMMA ATUARUK Inuit arlallit Londonimi aallaatillutik ikilerneqartut
