Vittus Qujaukitsoq - Londonimi pisunut misiginneqataavugut
Nunatta nalunaaqutaa malillugu nal. arfineq pingasut qaangerlugu tanneq pingasunngortoq, danskit tusagassiorfiisa nalunaarutigaat, Londonimi peqqarniisaarniartoqarnerani inuit tallimat toqutaasimasut, inuillu 40-t ikinnerpaamik ikilerneqarsimasut.
Nunatsinnilu Naalakkersuisut pisumut malinnaapput.
- Tuluit Nunaanni innuttaasunut Nunatsinnit misiginneqataavugut, Nunanut allanut tunngasunut naalakkersuisoq, Vittus Qujaukitsoq KNR-mut taama oqarpoq.
Saassussisoqarneranut atatillugu nunatsinneersoqanngitsoq, Vittus Qujaukitsoq oqarpoq.
- Londonimut peqqarniitsumik saassussineq malinnaaffigineqarpoq, danskillu Nunanut Allanut Kiffartuussivia qanimut suleqatigineqarpoq, Nunanut allanut tunngasunut Naalakkersuisoq, Vittus Qujaukitsoq KNR-imit nal. arfinermut apersorneqarluni taama oqarpoq.
Peqqarniisaarniarnermut pasineqartoq, ikaartarfissuarmi Westminster Bridgemi inuit pisuinnaat aqqutalugalugit apuivoq, tamatumalu kingorna Londonimi Inatsisartut isaariata eqqaani politiimut nakkutilliisumut savimmik saassussilluni kapisivoq, kingornalu pasineqartoq politiinit allanit toqunneqarluni.
