Peqatigiiffik: Kuannersuit pillugu ataatsimiisitsinissat kinguartillik
Naalakkersuisut aatsitassarsiutileqatigiiffillu Greenland Minerals Kuannersuarni aatsitassarsiulersaarneq pillugu kujataani illoqarfinni tallimani innuttaasunik februaarip aallartinnerani ataatsimiisitsissamaarput.
Innuttaasunilli coronavirusi siaruatsaaliniarlugu killilersuisoqarnerani ataatsimiisitsinissaq naapertuutinngitsoq, Narsami peqatigiiffik Urani Naamik isumaqarpoq.
- Tusarniaaneq corona pissutigalugu unitsikkallarneqassasoq siullermik piumasaraarput. Tulluarsorineruarput corona qaangiussimaleriarpat tusarniaaneq nanginneqassasoq, peqatigiiffiup Uran Naamiup siuliltaasua Jan Rethmar-Petersen oqarpoq.
AAMMA ATUARUK Kuannersuit pillugit innuttaasunut ataatsimiititsineq januaarip ulluisa 22-anni aallartissasoq
Kuannersuarni aatsitassarsiulerssaarneq pillugu innuttaasunik februaarip ulluisa tallimaannit qulingiluaata tungaanut ataatsimiisitsisoqartarnissaa pilersaarutaavoq.
Siullermik Narsarsuarmi kingornalu Qassiarsummi, Igalikumi Qaqortumi Narsamilu. Ccoronali pissutigalugu killilersuisoqarnerani inuit illup iluani katersuuttut 100-nit amerlaneroqqusaanngillat.
- Soorlu uagut akerliussutsimik takusitsinissatsinnut tunuarsimaartarpugut coronartoqarnera pissutigalugu, akisussaaqataarusukkatta tuniluuttoqannginnissaannut, Jan Retmar-Petersen oqarpoq.
Jens-Frederik Nielsen: Ataatsimiinnissat pisinnaapput Pilersaarutit attatiinnarniarpagut
Naalakkersuisut Greenlands Mineralsilu kujataani innutaasunik ataatsimiisitsinissartik suli pilersaarutigigaat, aatsitassanut naalakkersuisoq Jens-Frederik Nielsen (D) oqarpoq.
- Nakorsaaneqarfik Kuannersuarmut tunngatillugu pilersaarusioqatigaarput. Taamaammat killilersuinerit allallug atuukkaluartut tusarniaassutitsisinnaalluta naatsorsuutigaarput, taanna oqarpoq erseqqissaatigalugulu coronap tuniluunnera malinnaavigeqqissaaritsik.
AAMMA ATUARUK Naalakkersuisut aatsitassanik qaqutigoortunik Kuannersuarni suliniut tusarniaassutigigaat
- Tuniluuttoqalissagaluarpat pissutsit allangoriaannaapput, tuniluuttoqalinngippalli tusarniaanerit ingerlatissallutigit naatsorsuutigaarput, Jens-Frederik Nielsen oqarpoq.
Aatsitassarsiutileqatigiiffik Greenland Minerals Kuannersuarni qaqutigoortunik aatsitassarsiulersaarpoq, aamma uranimik.