Kuannersuit pillugit innuttaasunut ataatsimiititsineq januaarip ulluisa 22-anni aallartissasoq
Naalakkersuisut Greenland Minerals A/S suleqatigalugu nunatta kujaataani ullut 17-it qaangiuppata tassa januaarip ulluisa 22-annit 26-annut innuttaasunut ataatsimiititsiniarput.
Innuttaasunut ataatsimiititsinerit Kuannersuarni aatsitassarsiornissamut pilersaarummut tunngassuteqassapput.
Innuttaasunut ataatsimiititsinissamut ullussat sumiiffissallu:
- Januaarup ulluisa 22-at: Narsarsuarmi akunnittarfimmi nalunaaqutaq 19.00-imit 22.00-imut.
- Januaarup ulluisa 23-at: Qassiarsummi atuarfimmi nalunaaqutaq 11.00-imit 14.00-imut.
- Januaarup ulluisa 24-at: Igalikumi katersortarfimmi imaluunniit unnuisarfimmi nalunaaqutaq 11.00-imit 14.00-imut.
- Januaarup ulluisa 25-at: Qaqortumi akunnittarfimmi nalunaaqutaq 19.00-imit 22.00-imut.
- Januaarup ulluisa 26-at: Narsami katersortarfimmi 19.00-imit 22.00-imut.
COVID-19-ip atuunnerata nalaani katersuuttarnernut maleruagassat malittarisassallu atuuttut pilersaarummut tunngavissaatinneqarput. Taamaattumik piffissaq sumiiffillu allanngorsinnaassasut, Naalakkersuisut allapput.
Greenland Minerals sumiiffimmi tassani aatsitassanik qaqutigoortunik piiaarusuppoq. Naalakkersuisut tassunga atatillugu innuttaasut pilersaarummut isumaannik tusagaqarusupput.
AAMMA ATUARUK Urani Naamik: Tusarniaaneq unitsinneqarli
Tusarniaanermut atornertut Naalakkersuisut tusarniaanermut qupperneranni tamanut saqqummersinneqarnikuupput.
Tusarniaanermut atorneqartut tassaapput VVM, tassa avatangiisinut sunniutissanik naliliineq aamma VSB, pilersaarummit inuiaqatigiinnut aningaasaqarnermullu kigunissat pillugit naliliineq.
- Innuttaasut suliassamik saqqummiussivigineqarnissamik, tamatumalu kingorna suliassamik piginnittumut, oqartussanut aammalu aatsitassanut suliassaqarfimmi immikkut ilisimasalinnut arlaannaannulluunniit attuumassuteqanngitsunut apeqquteqarnissamut, naluunaarutiminnik tunniussinissamut il.il. periarfissinneqarnissaat siunertaralugu ataatsimiititsinerit aaqqissuunneqarput, Naalakkersuisut tusagassiuutinut nalunaarummi allapput.
Naalakkersuisut siulittaasuat, Kim Kielsen (S), aatsitassanut inuussutissanullu naalakkersuisoq, Jens-Frederik Nielsen (D) aamma suliffeqarnermut, ilisimatusarnermut avatangiisinullu naalakkersuisoq, Jess Svane (S) nunatta kujataani innuttaasunut ataatsimiititsinermi peqataassapput.
