NOAH Kuannersuit pillugit innuttaasunik ataatsimiisitsinissat: Pisariaqanngillat
Kujataani augustip 23-ani innuttaasunik ataatsimiisitsineq aallarteqqissaaq.
Kuannersuarni aatsitassarsiulersaarnermut tunngasunik kujataarmiut saqqummiussiffigineqaqqissapput. Kujataanimi innuttaasunut ataatsimiisitsisoqareernikuuvoq. Ukioq kingulleq februaarimi tamanna ingerlanneqarpoq. Taamaakkaluartoq aatsitassarsiulersaarnermut tunngasunik tusarnaaqqissapput.
Taamanimi Naalakkersuisuninngaaniit najuuttoqanngilaq.
Greenland Mineralsip Kuannersuarni aatsitassarsiulersaarneranut innuttaasunik ataatsimiisitseqqittariaqanngitysoq, Avatangiisinik illersuiniaqatigiiffik, NOAH, isumaqarpoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Minerals.
- Innuttaasunik ataatimiisitseqqinnissaq pisariaqarsorinngilarput, Niels Henrik Hooge NOAH-meersoq oqarpoq.
AAMMA ATUARUK Uranimik inerteqquteqarnissamut Naalakkersuisut aallartisartut
Naalakkersuisummi Kuannersuarni aatsitassarsiulersaarneq unitsinniarlugu pilersaaruteqarput. Taamaattumillu innuttaasunik ataatsimiisitsinissat pisariaqanngitsut avatangiisinut illersuiniaqatigiiffik isumaqarpoq.
- Kuannersuarni aatsitassarsiulersaarnissamik unitsitsisinnaasumik inatsisissatut siunnersuut tusarniaassutigineqarpoq. Siullertut, aatsitassarsiulersaarneq pillugu innuttaasunik ataatsimiisitsisoqareerpoq. Politikerinit peqataaffigineqanngikkaluarpoq, taamaattorli tusarniaanissamut inatsisit malinneqarsinamerinik tunngavilersuisoqarsinnaavoq.
Tusarniaaneq sivitsoqqinneqarli
Aatsitassarsiulersaarnermut unitsitsinissamut uranitalinnik qalluisinnaanissamik inerteqquteqartumik inatsiseqalissasoq Naalakkersuisut siunnersuutigaat, tamannalu ukiassami Inatsisartut ataatsimiilerpata eqqartorneqassasoq naatsorsuutigineqarpoq. Inatsisissatut siunnersuut Naalakkersuisuni taasitsitsisoqarluni aalajangiisoqareernissaanut innuttaasunik ataatsimiisitsinissamik kinguartitsinissaq NOAH-miit isumaqarput.
- Inatsisissatut siunnersuut taasititsissutigineqareernissaara tungaanut tusarniaaneq sivitsorneqarsinnaavoq, soorlu siornatigut taamaasiortoqarsimasoq. Marloriarmi tamanna kinguartinneqareersimavoq.
AAMMA ATUARUK Greenland Mineralsip eqqartuussissuserisut aatsitassarsiornermik suliniummik misissuisikkai
- Aalajangiiginnartoqarsinnaavoq aatsitassarsiorneq unitsinneqarluni, uranitalinnik qallueqqusaajunnaarnermik inatsisissamik akuersisoqarsimammat.
Pilersaarutit malillugit aatsitassarsiornermut naalakkersuisoq, Naaja Nathanielsen (IA), avatangiisinut naalakkersuisoq, Kalistat Lund (IA) peqqinnissaqarfimmilu naalakkersuisoq, Kirsten Fencker (Naleraq) innuttaasunik ataatsimiisitsitsiartorlutik aallassapput. Kommune Kujallermilu borgmesteriusoq, Stine Egede (IA), aamma peqataassaaq.
Kingullermi silarluttoqarnera pissutaalluni Qassiarsunni Igalikumilu innuttaasunik ataatsimiisitsisoqanngilaq. Taamanilu Nanortalimmi innuttaasunik ataatsimiisitsisoqarnissaanik pilersaarusiortoqarani. Massakkulli Nanortalimmi ataatsimiisitsisoqassaaq.
Nunatta kujataani innuttaasunut ataatsimiititsinissamut maanna pilersaarutit aaku:
Aggustip 23-at: Narsarsuaq – Hotel Narsarsuaq – ataatsimiittarfik nalunaaqutaq 19-mit 21.30.mut.
Aggustip 24-at: Qassiarsuk – Atuarfik nalunaaqutaq 19-mit 21.30-mut.
Aggustip 25-at: Narsaq – Katersortarfik nalunaaqutaq 19-mit 21.30-mut.
Aggustip 26-at: Qaqortoq – Hotel Qaqortoq – ataatsimiittarfik nalunaaqutaq 19-mit 21.30-mut.
Aggustip 27-at: Igaliku – Katersortarfik nalunaaqutaq 19-mit 21.30-mut.
Aggustip 28-at: Nanortalik – Kulturikkut illu nalunaaqutaq 19-mit 21.30-mut.
