Peqatigiiffik illersuisut nunatta illersuisuunera tapersersorpaa

- Inuit immaqa nakkaannartarsinnaapput illersuisussaqannginnertik peqqutaallutik apersorneqarnermi, politiinik killisiorneqarnermi apersorneqarneq ingerlatiinnarneqarluni. Tamakkuuppullu ilaatigut innuttaasumut pasilligaasumut annertuumik ilaatigut sunniuteqartarsinnaasut illersuisoqarsimanngikkaanni, Tom Ostermann, Peqatigiiffik Illersuisuni siulittaasoq taama oqarpoq.

AAMMA ATUARUK Illersuisuinik nutaanik ilinniartitsinissamut aningaasaqarniarneq aporfiusoq

Nunatsinni eqqartuussiveqarnermi suliani illersuisunik amigaateqartoqarnera, Nunatta Illersuisuunerata Finn Meinelip qanittukkut isornartorsiorpaa, illersuisussanik ilinniartitsinermut aningaasaliissutigineqartartut ikippallaartarnerat ilaatigut isornartorsiorlugu.

Nunatsinni illersuisut akuerisat 20-nit ikinnerupput, Nunattalu Illersuisuuneqarfia naapertorlugu illersuisut ikinnerpaamik 60-it pisariaqartinneqarlutik - illersuisullu arlallit ukiut tamaasa suliunnaartarmata amerlanerusinnaapput.

- Aallartinnitsinniik 60-it sinnerlugit taamatut ilinniartinneqarnikuupput, ullumikkullu assiliat imatut isikkoqarpoq 20-it tungaannaanut nunatsinni illersuisutut taamatut atorneqarlutik. Taannalu toqqammavigalugu illoqarfiit arfinillit missaat Kalaallit Nunaanni illersuisoqartinneqanngillat, illoqarfinni taakkunani ilinniarsimasunik illersuisoqanngimmat.

Nunatta Illersuisuuneqarfia naalagaaffimmit ukiumut aalajangersimasumik 2 millionit koruuninik aningaasaliiffigineqartarpoq. Danskit inatsisinik atuutsitsinermut ministereqarfia aningaasanut inatsimmi 2018-imit ukiunut tullernut pingasunut nunatsinni eqqartuussiveqarnermut katillugit 40 millionit koruuninik aningaasaliissuteqarpoq.

Aningaasaliissutinillu taakkunannga Nunatta Illersuisuuneqarfia 7,5 millionit koruuninik tunineqarpoq.