Pele Brobergip kommunalbestyrelsimut ilaasortaaffissani qimakkusukkaa

Naleqqap siulittaasua, Pele Broberg, maanna Sisimiuni najugaqarpoq. Taanna kommunalbestyrelsemut ippassaq qinersinermi 121-inik qinersiseqarluni Qeqqata Kommunianut ilaasortanngortussanngorpoq. Kisianni ilaasortatut suli ivertinneqaraniluunniit qinnutigissavaa.

Inatsisartut kommunalbestyrelsinut qinersisarnerit pillugit inatsisaat naapertorlugu kommunimut ilaasortaq qinigaaffiup iluani kommunalbestyrelsimit tunuarniarluni qinnuteqarpat tamanna kommunalbestyrelsip aalajangissavaa.

Pele Broberg Qeqqata Kommuniani najugaqarunnaarluni Kommuneqarfik Sermersuumi innuttaasunngoqqissamaalerpoq. Taamaammat Qeqqata Kommunalbestyrelsiani ilaasortaajunnarnissamik qinnuteqarpoq.   

- Nuliannguara 1.maj Nuummi aallartissagami suliffimmi nutaami.

- Takusinnaavara uani apriilip ingerlanerani nuliannguaralu tassa Nuummut nuuttussanngorpugut, Pele Broberg KNR-imut oqarpoq.

Pele Brobergip nulia, Malene Broberg, Kalaallit Nunaanni Brugsenimi aningaasaqarnermut maajip aallaqqaataani pisortanngussasoq, Kalaallit Nunaanni Brugseni ullaaq manna nalunaarpoq.

Taanna Qeqqata Kommuniani aningaasaqarnermut ilinniartitaanermullu maanna pisortaavoq.

Pele: Taaguunneqaatikka maangaannanngillat

Pele Broberg Nuummut uteqqittussanngorluni Facebookkimi qinikkatut quppernermini qinersineq aqaguttoq allappoq. Qeqqata Kommunianut qinigaanini Kommuneqarfik Sermersuumut nassarsinnaanngilaa. Qinersisinili 121-it partiini sinnerlugu qujaffigai, taakkualu pakatsisinnginnissaat naatsorsuutigaa.

- Qinersinikuunerat soorunami maangaannaq ingissanngilaq. Tassa Naleraq suli sisamanik ilaasortaatitaqassammat taakku qinersisimanerat pillugit, taanna oqarpoq.

Partiip sinniisussaata siulliup, Jens Lyberthip, aamma Meeqqamik ilisimaneqartup, kommunimut ilaasortannguinnissaa naatsorsuutaavoq.

- Kommunemut sinniisora tassa isertussanngortoq takusinnaalereerpara, Pele Broberg oqarpoq.

Jens Meeraq Lyberth KNAPK-imi siulittaasup tulliatut maannakkullu siulittaasuugallartutut aamma atuuppoq.

Qineqqusaaqqinnianngitsoq

Pele Broberg Kommuneqarfik Sermersuumi qinikkatut qinigaaffimmi maanna qaangiuttumi aamma atuukkaluarpoq. Sisimiunulli nuunnerminni tassani ilaasortaajunnaarpoq. Maannakkut aamma taamannarpiaq pisussanngorpoq. Taamalu pisoqaqqeqqunagu kommuninut qineqqusaaqqinngikkallassalluni aalajangiuppaa.

- Aappassaa sassarpunga aappassaalu tunuartariaqarlunga nuunneq ilutigalugu.

- Naatsorsuuteqanngilanga sassaqqinnissanut kommunimut sumiikkaluarumaluunniit, Pele Broberg oqarpoq.

Taassuma nuliani sumi atorfeqarnera apeqqutaatillugu malittariuassallugu neriorsornikuugini ilanngullugu aamma oqaatigaa.