Pave Frans: USA Europalu Syriami Yemenimilu sorsuttoqarnerani meeqqanik toqoraasoqarneranut pisuupput
Europa USA-lu sakkussianik nunanut sorsuffiusunut soorlu Syriamut, Yemenimut Afghanistanimullu tunisaqarnermikkut meeqqat tuusintilikkaat toqutaanerannut toqqaannartumik akisussaaffigaat.
Paavi Frans Italiami illoqarfissuarmi Milanomi ilagiit katuullit ilisimatusarfiisa ilaanni Collegio San Carlomi ilinniartunut ilnniartitsisunullu oqaluussigami taama ilaatigut oqarpoq.
- Europa USA-lu pigissaartut sakkussianik tunisassiorput. Sakkut toqoraanermut atorneqartut. Meeqqat toqorarneqarput, paavi oqarpoq.
- Nuna sakkussianik tunisassiortoq meeqqat toqutaasarnerannut pissutaaqataaginnanngillat, ilaqutariilli atugarliulernerunerannut aamma pissutaaqataapput, paavi Frans oqarpoq.
Nunat amerlanerit qimaasunik tikilluaqqusillutillu inuiaqatigiinnut akuunerulersitsinissaat paavip ilanngullugu kaammattuutigaa. Qimaasullu amerlasuut pinerlunniartuunerannut ernummateqarneq paavip akuersaarumaanngilaa:
- Nunanit allaneersut amerlanerit Italiami pinerlunniartuunngillat. Pinerlunniat nunatsinneersut ajoraluartumik amerlapput. Mafia Nigeriamiunit aallarnerneqanngilaq, nunatsinniuni pinngortoq. Qimaasut nunatsinnik pisuunerulersitsipput, Europami qimaasunit tunngavilerneqarpoq, Paavi Frans ilaatigut oqarpoq.
Qimaasut nunani assigiinngitsuni tikilluaqqusaanissaat Paavip aatsaat oqaatigilinngilaa, assersuutigalugu Juullimi oqaluussigami qimaasunik tikilluaqqusitsisoqarnerunissaa kaammattuutigaa, paavilumi Argenitinameersoq nammineq Italiamit kingoqqisuuvoq.
/ritzau/AP
