Pave Francis oqarpoq Canadami nunap inoqqaavisa kulturiannik nungutitseriartoqarsimasoq

Pave Francis Canadamiit ippassaq aallartinnagu tusagassiortunik katersortitsinermi Vatikanip nunap inoqqaavisa suliarpassuinik katersaateqarnera tikinneqartoq, Canadami ilanngutaasiortorput Marianne Stenbæk paasissutissiivoq.

Pave tassani oqarpoq Canadami nunap inoqqaavisa kulturiannik nungutitseriartoqarsimasoq.

Nunasiaateqarsimaneq apeqquteqarpassuillu tassunga tunngasut imminut katuullillu ilagiivinut akeqquneqartut saammaateqatigiinnissamut aqqummi ilanngunneqassanerarpai.

Pavep Canadamukarluni utoqqatseriartornera saammaateqatigiinnissamut alloriarluarnerusutut isigineqarpoq, tassanngaanniilli ingerlariaqqittoqassappat aamma aaqqitassarpassuaqarpoq.

Canadami nunap inoqqaavisa suliarpassui paasissutissaataallu Vatikanimi ukiorpassuarni katersaatigineqartut uterteqquneqarput.

Nunasiaateqarnissamut piginnaatitsissut peerneqarli

Nunap inoqqaavisa amerlasuut pingaarnerpaatillugu Europamiut nunarsuarmi nunanik allanik nassaartuusarsimanerannik oqartarneq atorunnaarseqquaat oqaluttuarisaanermiillu peeqqullugu.

Europamiut nunanik allanik nassaartutut naqissuserneqartarnissaat pillugu 1493-imi paveusimasup aallagarisimasaa nunasiaateqalernissamut piginnaatitsissutitullusooq isigineqartoq ukiuni untrilikkaani atorneqarsimavoq, nunasiaateqarmillu tunngaviliisutut oqaatigineqartarluni.

Pavep taamanerniit pisinnaatitsissutaa taanna tunngavigalugu Europami kristumiut nunani allani inuit kristumiuunngitsut nunaannik tiguaasarsimapput, nunallu tiguakkamik inuinik nungusaasarsimallutik.

Pavep pisinaatitsissutaa 1400-kkut naalerneranneersoq suli pigineqarpoq, allakkiarlu taanna nunasiaateqartarnermut pingaaruteqaqisoq maanna aserorteqquneqartoq atorlugu, Amerikap nunavittaa avannarleq kujallerlu, Afrika Australialu nunasiaatigineqalersimapput, taakkunanilu najugaqaqqaartut naqisimaneqarlutillu toqorarneqartarsimapput.

Pave Francisip utoqqatsernera isumakkeerfigeqquneralu saammaateqatigiinnissap tungaanut aallarniutaasoq nunap inoqqaavisa oqaatigaat, maannakkullu iliuuseqarnissat tullinnguutissapput.