Kujalleq Partiit sassartitaasa ilaat apeqqarissaarfigineqassapput
Partiit pingasut apeqqarissaarnissamut sassartitassaasa sammisassaat ilaatigut tassaapput Meeqqat Illersuisuata Kommune Kujallermi angalanermini nalunaarusiaa, meeqqat pisinnaatitaaffiisa pitsanngorsarneqarnissaannut tunngasut tassani ilaatigut oqallisigineqassallutik.
AAMMA ATUARUK Kujallermi meeqqat naligiimmik ikiorneqanngillat
- Takornariartitsineq, meeqqat atugaat nunaqarfiillu inerisarneqarnissaat sammisassanut ilaapput, suleqaterput Kassaaluk Kristiansen, oqarpoq.
Isumaqatigiissuteqaraluarlutik aamma isumaqatigiinngissuteqarput
Naallu partiit akunnerminni assigiinngitsunut tunngatillugu kommunini atukkat, qanorlu taakku pitsanngorsarneqarsinnaanerat pillugit isumaqatigiissuteqaraluartut suut isumaqatigiinngissutigineraat apeqqutigaarput, Kassaaluk Kristiansenilu ima akivoq:
- Tamanna nalileruminaatsipparput, kisianni maluginiakkatta ilagaat borgmesterit saniatigut suliffeqarsinnaanissaat pillugu apeqqummi Inuit Ataqatigiit naaggaarluinnartuusut, Siumut Atassullu akuersaartut. Taassuma saniatigut Atassut ineqarnermi inuussutissarsiornermilu namminersortunngorniartunut samminerusumik aallaveqartumik politikkeqartoq maluginiarparput. Kisianni partiit ataatsimut isigissagaanni tamarmik, tupinnanngitsumik, meeqqat atugaannik inunnillu isumaginninnermi sulianut assut ukkassuseqarusunnerat malunnarpoq, Kassaaluk Kristiansen oqarpoq.
AAMMA ATUARUK KNR klar til vælgermøde
Inuussutissarsiutitigut ineriartortitsisoqarnissaa, ineqarniarnermilu sanaartortoqarnerunissaa, Siumup Atassullu arfininngornermi qineqqusaartoqarnerani sammineruaat, Inuit Ataqatigiillu inunnik isumaginninneq samminerugaat.
- Partiit ataatsimut isigissagaanni tamarmik, tupinnanngitsumik, meeqqat atugaannik inunnillu isumaginninnermi sulianut assut ukkassuseqarusunnerat malunnarpoq, Kassaaluk Kristiansen oqarpoq.
Kommune Kujallermi qinersisoqarnissaanut atatillugu kalaallisut apeqqarissaartitsineq, KNR-TV-kkut toqqaannartumik unnugu nalunaaqutaq arfineq-pingasunut qiteqquppat aallakaatinneqassaaq, qallunaatullu qulingiluanut tanneq arfineq-pingasunut, 20:40, aallakaatinneqarumaarluni.