Partiit minnerit pingasut: Ikiorsiissutit amerlanernit suleqatigiissutigineqartariaqaraluarput
Corona virusip Nunatsinni atugaanerani Kalaallit Nunaanni inuussutissarsiornermik suliallit aningaasarsiornikkut ajornartorsiulersinnaasut pillugit Naalakkersuisut aningaasanik millionilikkaanik ikiorsiissutissanik suliaqarput.
Aningaasallit amerlavallaartut, Partii Naleraq isumaqarpoq. Aamma Atassut Suleqatigiissitsisullu pisoq pillugu tusarniarneqarsimannginnertik erloqinartutut isigaat.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Nunatsinni inuussutissarsiornermik ingerlataqartut coronavirusip tuniluutilernerata nalaani aningaasarsiornikkut ajalusoorsinnaasut pillugit Naalakkersuisut ikiorsiissutissatut siunnersuutaat, Akileraartarnermut Aningaasaqarnermullu ataatsimiititaliami ilaasortanit amerlanerussuteqartunit akuersissutigineqarpoq.
Taama nalunaartoqareersorlu Partii Naleraq isumaqataannginnerminnik ilisimatitsivoq.
- Aningaasat Inuussutissarsiortunut tunniussassat amerlasoorsuummata, Aningaasanut Akileraartarnermullu Ataatsimiititaliaq Naalakkersuisunut pisinnaatitsissummik taama ittumik tunniussisinnaanngitsoq isumaqarpugut. tamatumani Inatsisartunut ilaasortanit ikinnerpaamik 16-init suliarineqaqqaartariaqartoq isumaqaratta, Inatsisartunut ilaasortaq Parti Naleqqameersoq, Jens Napaattooq Sermitsiaq.AG-mut oqarpoq.
AAMMA ATUARUK Sulisitsisut: Ikiorsiissut suliffeqarfinnut ingerlanerliortunut amerlasuunut annaassissaaq
Aamma Atassut Suleqatigiissitsisullu isornartorsiuipput. Partiit minnerit suliami matumani peqataatinneqarsimanngitsut, taakku isumaqarput.
- Assigiinngitsutigut inatsisitigut suliaqarnermi pingaaruteqartunik saqqummiussiniarnermi ileqquuvoq, partiit tamarmik inissaqartinneqartarnerat, taamaattumillu aamma pissusissamisuuginnarluni coronamut atatillugu aarlerinartorsiornermi taamatuttaaq ingerlasoqarnissaa, Atassut Suleqatigiissitsisullu tusagassiuutinut ataatsimoorlutik nalunaarumminni allapput imalu nangillutik.
- Inatsisitigut ikiorsiissutitut aaqqiiffiginninnerit, aningaasaliinerit kiisalu allat suliat pingaaruteqartut ilutigalugit isumaqarpugut kikkut tamarmik ilassuteqaatigisinnaasaat pingaaruteqarluinnartut. Sunami tamarmi isigigaanni inatsisitigut aalajangersaatit aammalu aningaasaliinissamut tunissuteqaatit inuiaqatigiit iluanni pingaaruteqarluinnartutut inissisimammata, Atassut Suleqatigiissitsisullu tusagassiuutinut nalunaarummi allapput.
AAMMA ATUARUK Coronavirus: Inuk Hostelip millionip affaa annaareerpaa
Partiit tusagassiuutinut nalunaarutitik ataasinngormat itisilerusunngilaat.