Partiit kannguttaatsuliornermut eqqartuussisoqareersorlu: Tamanut oqariartuut pingaarutilik
Imminut oqaluuteriaaseq qanoq isumaqarfigaajuk? Iviangigissoqartoq imaluunniit nulugissoqartoq oqartoqarsinnaava?
- Politikkimi taamaattoqartarpoq.
Taama Naalakkersuisut aamma Siumup siulittaasorisimasaa, Kim Kielsen, kannguttaatsuliortoqarsimanera pillugu eqqartuussivimmi suliaqarnermi partiimi allattaanerusimasuminut ilisimannittutut apersorneqarnermini sapaatip akunnerata siuliani oqarpoq.
Suliaq naatsumik
- Sumut partiimi allatsigisimasaa, Mikael Petersen Nunatta Eqqartuussisuuneqarfianit kannguttaatsuliorsimasutut sisamanngormat piumasaqaatitaqanngitsumik ulluni 40-ni pineqaatissinneqarsimasunut inissiisarfimmiittussanngortinneqarpoq.
- Eqqartuussivimmi suliaq januaarimi suliarineqarpoq. Mikael Petersen taamani ulluni 60-ini pineqaatissinneqarsimasunut inissiisarfimmiittussanngortinneqarpoq. Taassuma aalajangerneq taanna suliassanngorteqqippaa.
- Mikael Petersen arnanut sisamanut Siumup partiiata allaffianut 2013-imit 2019-imut attuumassuteqartunut kannguttaatsuliorsimasutut unnerluutigineqarpoq.
- Folketingimut ilaasortaq, Aki-Matilda Høegh-Dam taakkununnga ilaavoq.
-
Aki-Matilda Høegh-Damip nassuiaatigaa: ’Oqimaalleqqilariaruni siniffimmi ilagalugu mamassasoq’, ’amaamaalu allisimasut’ taassuma oqaatigisimagaa. Nutsani naamallugit assani nuluminukartissimagai aamma oqaatigalugu.
-
Mikael Petersen Siumumi ukiuni 38-ni suliarineqarpoq, taannalu Naalakkersuisunut aamma ilaasortaanikuulluni. Aamma Siumumi siulittaasumut tullersortaanikuuvoq.
Atassutip siulittaasuata, Aqqalu Jerimiassenip, iviangigissoqartoqarneranik imaluunniit nulugissoqarneranik politikkimi oqartoqarsinnaanerarlugu Kim Kielsenip oqarnera sakkortuumik akerlilerpaa.
- Atassummi arnartagut ataqqiuarsimavagut siuttorisarlugillu aallartinnitsinniit, Aqqalu Jerimiassen oqarpoq.
Taanna isumaqarpoq Siumup aamma Naleqqap allattaanerisimasaanut eqqartuussut kannguttaatsuliorluni pissusilersortarnerit akuersaarneqanngilluinnarnerannut ersersitsisuusoq.
- Allat oqarpata 'politikki taamaappoq' Atassummiit akerlererujussuarparput. Taamaanngisaannassaaq, Aqqalu Jerimiassen oqarpoq.
Taassuma aamma Atassut aningaasaqarnerminik ajalusoorsimanini ilinniutigilluarsimagaa assersuutigivaa.
- Siumukkunni kannguttaattuliornikkut nalaataqarmata qularnanngilaq ilinniutigisimassagaat akuersaarneqarsinnaanngisaannartoq, oqarpoq.
Taamaakkaluartorli Atassut kannguttaatsuliortarnernut pinaveersaartitseqataasinnaasumik suli politikkeqalinngilaq.
AAMMA ATUARUK Siumup Mikael Petersenimut suliaq pimooruppaa: Kikkunnut tamanut ilinniutaassaaq oqarput
- Atassut ukiuni kingullerni nutarsangaatsiarnikuuarput. Naqqaniit aningaasaqarneq, aaqqissuussaaneq, ilaasortaatitaqarneq, Atassutillu tunngaviusumik isumai nutarterujussuarnikuuvagut. Taamaattumik immikkut ittut suli suliarineqanngillat, Aqqalu Jerimiassen oqarpoq.
Partiilu kannguttaatsuliortarnermut pinaveersaartitsisinnaasumik sulisoqarnermut politikkimi suliaqarnianngikkaluarluni, pineqartoq pillugu ersarissumik isumaqarpoq.
- Inatsisit malillugit, inoqatinullu pissuserissaarneq, naligiisitaaneq ataqqinninnerlu malillugit kannguttaatsuliorneq soorunamilerujussuaq akerleraarput, oqarpoq, nangillunilu:
- Kannguttaatsuliortunillu aqqusaagaqassagutta piaartumik iliuuseqassaagut.
Inuit Ataqatigiit
Partii tapersersortigisartik assiginagu nunatsinni partiit anginersaat, Inuit Ataqatigiit, kannguttaatsuliortarnerit iliuuseqarfigineqartarnissaannut politikkissaminik piareersimasuuteqarpoq.
- Inuit Ataqatigiinniit kannguttaatsuliornerit aamma nakuusernerit tamaasa akuersaarnagit inissisimavugut, Inuit Ataqatigiit siulittaasuat Múte Bourup Egede naqissusiilluni oqarpoq.
- Massakkut missingiummik peqarpugut. Aamma Folketingemi allattoqarfitsinni peqareeratta. Missingiut taanna pigisarput Inatsisartut tikeriarpata ilaasortaatitatsinnut saqqummiutissavarput, oqarpoq.
Demokraatini Atassutikkut assigalugit kannguttaatsuliortarnermut pinaveersaartitsisumik politikkeqartoqanngilaq.
- Demokraatinit pingaartittorujussuuarput tamat oqartussaanerisa ataani, pissaanerup avinneqarnerani eqqartuussiveqarnerup ataani inuugatta, Jens Frederik Nielsen oqarpoq.
- Tassanilu eqqartuussiviup aalajangiussaasa ataqqinissai pingaaruteqarput, soorlu pineqaatissinneqartup pineqaatissinneqarnini ataqqisariaqaraa.
Demokraatillu kannguttaatsuliortarnernut politikkeqanngikkaluarlutik eqqartuiuartarnissaq pingaartikkaat partiip siulittaasua oqarpoq.
- Maannakkut nalilinngilarput allattorsimasunik peqartariaqartugut. Nalilerparput inoqatigiittut aamma suleqatigiittut oqaloqatigiinneq pingaarnerpaajusoq.
- Taavalu pingaartillugu qullersaqarfimmut matu ammajuaanarnissaa. Kinaluunniit oqaasissaqarpat apuusisinnaanissaa.
Naleraq KNR-imit aamma oqaaseqartinniaraluarparput, Naleqqalli siulittaasua Hans Enoksen KNR-i arlaleriarluni saaffiginnissuteqaraluartoq akissuteqanngilaq. Hans Enoksenip Siumumi ilaatigut siulittaasuunerata nalaani Mikael Petersen allattaanerunikuuvoq, aamma kannguttaatsuliortoqarsimaneranut suliaq saqqummiunneqareersoq Siumumi soraarmat Hans Enoksenip Naleqqami allattaanertut atorfinitsinnikuuaa.
