Inga Dora. Markussen Siummumi siulittaasup tulliata aapparaa.Assi: Vestnordisk Råd

Siumup Mikael Petersenimut suliaq pimooruppaa: Kikkunnut tamanut ilinniutaassaaq oqarput

Kinguaassiutitigut kannguttaatsuliornermut politikkiliorneq tamatumunnga piniinnartoqarnissaraluanik unitsitsissaaq, partiillu nuannaarutigaa Mikael Petersenimut suliaq maanna naammassineqarmat, neriuppullu pisoq inuiaqatigiinni ilinniutaajumaartoq.

Sapaatip akunnerata siuliani ukiuni arlalinni Siumumi allattaasimasumut Mikael Petersenimut eqqartuussivikkut suliaq naammassivoq. Taanna kinguaassiutitigut innimiilliorfiginnissimasutut pisuutinneqarpoq, pisorlu taanna Siumumiit aamma iliunniutaavoq.

Taama oqarpoq Siumumi Siulittaasup tulliata aappaa aammalu Siumut politikkiani kinguaassiutitigut innimiilliorneq pillugu oqaaseqartartuutitaq Inga-Dora Gudmundsdottir Markussen.

- Tamanna ilinniutigaarput, suliffeqarfimmi taamaaliorneq nuanniitsumik timikkut tarnikkullu misigititsisinnaammat. Matumanilu pineqartoq assut tujorminartumik suliffiup iluani tujormisitsinermik kinguneqarsimavoq, tamannalu iluamik tamanna pillugu malittarisassaqarsimagaluarpat pinngitsoortinneqarsimasinnaagaluarpoq, taanna oqarpoq nangipporlu:

Suliaq naatsumik

  • Sumut partiimi allatsigisimasaa, Mikael Petersen Nunatta Eqqartuussisuuneqarfianit kannguttaatsuliorsimasutut sisamanngormat piumasaqaatitaqanngitsumik ulluni 40-ni pineqaatissinneqarsimasunut inissiisarfimmiittussanngortinneqarpoq.
  • Eqqartuussivimmi suliaq januaarimi suliarineqarpoq. Mikael Petersen taamani ulluni 60-ini pineqaatissinneqarsimasunut inissiisarfimmiittussanngortinneqarpoq. Taassuma aalajangerneq taanna suliassanngorteqqippaa.
  • Mikael Petersen arnanut sisamanut Siumup partiiata allaffianut 2013-imit 2019-imut attuumassuteqartunut kannguttaatsuliorsimasutut unnerluutigineqarpoq. 
  • Folketingimut ilaasortaq, Aki-Matilda Høegh-Dam taakkununnga ilaavoq.
  • Aki-Matilda Høegh-Damip nassuiaatigaa: ’Oqimaalleqqilariaruni siniffimmi ilagalugu mamassasoq’, ’amaamaalu allisimasut’ taassuma oqaatigisimagaa. Nutsani naamallugit assani nuluminukartissimagai aamma oqaatigalugu.

  • Mikael Petersen Siumumi ukiuni 38-ni suliarineqarpoq, taannalu Naalakkersuisunut aamma ilaasortaanikuulluni. Aamma Siumumi siulittaasumut tullersortaanikuuvoq. 

- Siorna novembarip 29-iani Siumumi siuttut ataatsimeersuarneranni erseqqissumik allapparput.

Partiimili siuttuusimasoq Kim Kielsen massakkullu siuttut Mikael Petersenip pissusilersuutaa pillugu isumaat assigiinngissimaqaat

Mikael Petersenimut eqqartuussinerup ingerlanerani Kim Kielsen oqarpoq, eqqartuussivikkut taamatut suliassanngortitsineq pissaaneqarniunnermik peqquteqartoq, tassa nammineq siulittaasutut uppitinniarneqarnissani matumani pillugu taama pisoqartoq.

Tamanna pillugu una atuarsinnaavat:

Eqqartuussivikkut suliaq inuiaqatigiinni ajornartorsiuteqarnermik ersersitsivoq

Inga Dora G. Markussenip suliaq pinartutut tigunerarpaa, erseqqissaatigaali taamaallaat Siumumi tamanna piunngimmat aammali inuiaqatigiinni tamani ajornartorsiutaammat.

- Inuiaqatigiinni tamani tamanna atugaavoq, suliffeqarfinnilu immikkut malittarisassiuunneqartariaqaraluarpoq oqallisigineqarluartariaqaraluarlunilu, oqarpoq.

Taamatuttaaq isumaqarnerarpoq, suliaq aqqutaalluni takutinneqartoq, tamanna pillugu inuiaqatigiinni nikittoqartoq, iliuuseqartoqartorlu aammalu suliffimmi kultureqartussaatitaaneq oqallisaalerluni, taamaammalluuna Siumumi siusinnerusukkulli kinguaassiutitigut innimiilliortarneq pillugu malittarisassaqartoqarsimanngitsoq.

- Inuit taakku pineqarnertik pillugu sapiissuseqarlutik pineqarsimanertik pillugu oqaluttuarput tamannalu eqqartuussisulersuunneqarpoq, tamannalu aamma isumaqarpoq inuiaqatigiinni tamatuma oqallisigilluarneqarnissaa tullinnguuttoq, tamannalu pingaartuuvoq, oqarpoq.

Kulturi nipangiussisimasoq

Killissamik qaangiilluni suliffinni pissusilersortarnermut tunngasoq ilaatigut ima imaqarpoq:

- Soorunami ajoraluaqaaq, taamaattoqartarmat, tamatumunngalu takussutaaginnarpoq tamanna akuersaarneqartarsimasoq, suliffeqarfinnilu erseqqissumik killiliisoqartarsimanngitsoq, tassalu kulturikkut nipangiussisarsimaneq, Inga Dora G. Markussen oqarpoq nangipporlu:

- Eqqartuussineq manna aammalu tamatuma inernera maanna ingerlariaqqititsissaaq aammalu oqallinneq nangeqqissaaq, aammalu kulturikkut nipangiussiunnaartariaqalerpugut, kajumissaarerusunnarporlu taamaattoqartillugu nipangiussisoqartaqqunagu, oqarpoq.

Taanna aamma erseqqissaavoq 2017-mi amerikami MeToo pilermat tamanna aamma nunatsinnut ingerlaqqissimasoq.

Siumup kinguaassiutitigut kannguttaatsuliortarneq pillugu politikkia ilaatigut tassaavoq tamatumunnga akuersaanngilluinnarnissaq, malittarisassat tassunga tunngasut matumani atuarneqarsinnaapput.

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat