Partiit arlaliullutik naalakkersuisunngortitsinissaat Savalimmiuni qinersinermi ajugaasup kissaatigigaa
Partiit ukiuni kingullerni sisamani illuatungiliuttuusut qinersinermi ajugaasoq, Socialdemokraatit siulittaasuat Aksel V. Johannesen, ippassaq pingasunngornermi unnukkut ataatsimeeqatigaat.
Socialdemokraatit saniatigut, Republikanerit partiilu Fremskridt qineqqusaarnermi suleqatigiipput naalakkersuisunngortitsinissarlu oqaloqatigiissutigissallugu maanna piareerlutik. Partii alla, Nyt Selvstyre, (Namminersornermik aaqqissuussineq Nutaaq) naalakkersuisooqatigiinni kingullerni peqataajunnaarsimasoq naalakkersuisunngortitsiniarluni isumaqatigiinniarnerni aamma peqataavoq.
AAMMA ATUARUK Nammineernerulernissaq naalakkersuisunngortitsiniarnermi pingaartoq
Partiillu pingasut Lagtingimi amerlanerussuteqareeraluartut partiit sisamaallutik naalakkersuisunngortitsinissaat Aksel V. Johannesenip orniginartinneruaa.
- Nyt Selvstyre suleqatigilluarsimavarput, taamaammat periarfissat arlaqarput. Partiit sisamaallutik naalakkersuisunngortitsinissaat kissaatigaara. Periarfissat qanoq ikkumaarnersut takujumaarparput, Aksel V. Johannesen taama oqarpoq.
Partiini tusarfiit Savalimmiuni nutaarsiassaqartitsiviup oqaloqatigisimasai naapertorlugit Savalimmiut Danmarkimut atanerata qanoq ilusiligaanissaata isumaqatigiissutiginiarnissaa apeqqutaassasoq, nittartagaq sermitsiaq.ag allappoq.
Socialdemokraatit naalagaaffeqatigiinneq ingerlatiinnarusuppaat partiilli sinneri Danmarkimit avissaarusullutik.