Pele Broberg Partii Nalerarlu Karl Frederik Danielsenimik qangalili isornartorsiuisarpoq.Assi: Pele Broberg

Partii Naleraq Karl Frederik Danielsenimut tatiginninnginnermik taasisitsiniartoq

Partii Naleraq Karl Frederik Danielsenimik qangalili isorinnippoq, tatiginninnginnermillu siorna taasititsiniaraluarluni.

Partii Naleraq attaveqaqatigiinnermut naalakkersuisumik Karl Frederik Danielsenimik (S) tatiginninnginnermik taasititserusuppoq. 

Naalakkersuisut mittarfiliornissamut inatsisinik unioqqutitsisumik siunnersuuteqarsimasut, partiimit isumaqarput.

- Ineqarnermut attaveqaqatigiinnermullu naalakkersuisoq tatiginninnginnermik taasititsinermik Partii Naleqqamit saqqummiussiniarpugut, Pele Broberg tatiginninnginnermik taasititsinermik siunnersuuteqarami oqarpoq

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

Inatsisartut ataatsimiinnerat maanna unikkallarpoq.

Qangalili isorinnittut

Partiit illuatungiliuttut Karl Frederiksenimik qangalili isorinnipput.

Illuatungiliuttut naalakkersuisoq mittarfiit pillugit eqqunngitsunik siorna oqaaseqartarsimanerarpaat.

Partii Nalerarlu tatiginninnginnermik ukiakkut siorna ataatsimiinnermi taasititsiniaraluarpoq. Mittarfiilli pillugit oqaluuserisassatut pilersaarutit oqaluuserineqanngitsoormata, taamaaliornissaminnut siorna periarfissaqarunnaarput.

AAMMA ATUARUK Karl Frederik Danielsenimut tatiginnikkunnaaqqusiniarneq qatangiinnartoq

Upernaakkullu ataatsimiinnermi coronavirusi pissutigalugu sivikillineqartumi oqaluuserisassani mittarfiit oqaluuserineqanngimmata, aamma tassani periarfissaqanngillat.

Tatiginninnginnermilli ullumi taasititsiniarnerup isorinnikkunnaarsimanngitsut takutippaa.

Tasiilami Ittoqqortoormiinilu mittarfiit piumasaqaatinik eqquutsitsisutuaasut

Naalakkersuisut nunatsinni timmisartuussinermik pitsanngorsaaniarnerat suliami matumani pineqarpoq.

Ilulissani Nuummilu mittarfinnik sanaartornerup Qaqortumilu mittarfiliornissamik pilersaaruteqarnerup saniatigut suli amerlanernik mittarfiliortoqarnissaa Naalakkersuisut kissaatigaat.

Taamaammat Qeqertarsuarni, Qasigiannguani, Kangaatsiami, Narsami, Nanortalimmi, Uummannami, Tasiilami Ittoqqortoormiinilu mittarfiliornissamut periarfissat misissorneqarpoq. Naalakkersuisullu mittarfiit sorliit salliutinneqassanersut pillugu Inatsisartunut isummeqqusipput. 

Sanaartornermut ataatsimiititaliaata siunnersuut suliarereerpaa. Mittarfiillu nunatta karsianut artukkiivallaannginnissaat pillugu inatsisinut innersuussivoq. Tunumilu mittarfiit marluk inatsisit piumasaqaataannik naammassinnittut attaveqaqatigiinnermut naalakkersuisoqarfiullu nassuiaataata ersersippaa.

AAMMA ATUARUK Naleraq: Karl Frederik Danielsenimut tatiginninngilagut

Illoqarfinni misissuiffiusuni allani mittarfiliornerit inatsisinik akerliusut Inuit Ataqatigiit Partii Naleqqallu erseqqissaatigaat. Taakkunanili mittarfiliortoqarsinnaassasoq naalakkersuisoqarfik nassuiaammini allappoq. Taamaaliortoqassappalli assersuutigalugu ineqarnermut, ilinniartitaanermut peqqinnermullu aningaasaliissutit ikinnerussapput.

Partii Naleqqalli Inuit Ataqatigiillu inatsisit nunatta aningaasaqarneranut artukkiivallaannginnissaat pillugu piumasaqaatai kisimi Tunumi mittarfiliusinnaasunit eqquutsinneqartut erseqqarinnerutikkusuppaat. 

- Tamanna Naalakkersuisut aalajangiiffigisassatut siunnersuukkut Inatsisartunut eqqumaffigeqqusimanngimmassuk Inuit Ataqatigiinnit Partii Naleqqamillu sakkortuumik ajuusaarnartinneqarlunilu isornartoqartinneqarpoq, partiit illuatungiliuttut marluk siunnersuutip isumaliutissiissutaani allapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat