Karl Frederik Danielsenimut tatiginnikkunnaaqqusiniarneq qatangiinnartoq

Ineqarnermut Attaveqatigiinnermullu Naalakkersuisumut Karl Frederik Danielsenimut (S) sapaatit-akunneranni uani marlunngornermi pingasunngornermilu tatiginnikkunnaaqqusiniarneq qatangiinnarpoq. Oqaluuserisassaq, tatiginnikkunnaaqqusinermik nalunaaruteqarfiusinnaasoq kinguartinneqarmat tatiginnikkunaarnermik taasinissaq piviusunngunngitsoorpoq.

Karl Frederik Danielsen mittarfissualiornissat pillugit paasissutissanik eqqunngitsunik assigiinngitsunillu Inatsisartut ataatsimiititaliaannut tusagassiutinullu saqqummiinikuusuutut Partii Naleqqap nalilerlugu inuttaa tatigiunnaarpaa.

AAMMA ATUARUK Naleraq: Karl Frederik Danielsenimut tatiginninngilagut

Immikkoortorli taanna Inatsisartut ataatsimiittarfianni oqaluuserineqalertinnagu tatiginnikkunnaaqqusinermik nalunaaruteqarsinnaanngillat. Immikkoortup kingusinnerusukkut oqaluuserisassanngortinneqarnera pissutigalugu marlunngormat tatiginnikkunnaaqqusinissaraluartik qatangiinnartoq, Pele Broberg ilisimatitsivoq.

Naleraq suliani arlalinni tatiginninngilaq

Naleqqalli Karl Frederiksenip mittarfissualiornissanut tunngasutiguinnaanngitsoq sulianulli aamma allanut tunngatillugu paasissutisseeriaaserisimasai naammaginartinngikkai, Pele Brobergip erseqqissaatigaa.

- Kiffartuussinisamut isumaqatigiissutit suliarineqannginneri tamatumalu kingornali imminnut assortuuttunik paasissutisiisarneri aamma pivagut, Pele Broberg oqarpoq.

Suleqatigiissitsisuneersup Tillie Martinussenip kiffartuussinissamut isumaqatigiissutinut tunngasunut siunnersuutaa - immikkoortoq 99 - novemberip ulluisa 13-ianni oqaluuserisassat aamma ilagaat. Tamatumunnga atatillugu Karl Frederik Danielsenip oqaaseqarnissaa Pele Brobergillu tatiginnikkunnaaqqusinermik nalunaaruteqarnissaa ilimagineqarsimagaluarpoq.

Taamatulli aammaartumik pisoqanngilaq. Tillie Martinussenili Inatsisartut ataatsimiittarfianniinngimmat siunnersuutaa oqaluuserineqartussaajunnaariataarpoq.

Taamatulli iliorneq Tillie Martinussenip, Pele Brobergip aamma Muté Bourup Egedep (IA) isumassaqartinngilaat.

Immikkoortoq kingusinnerusukkut oqallisigisassanngortikkaa

Tamatuma siuliatut oqaluuserisassaq Siumumeersoq partiimit tassanga tunuartinneqarpoq, tamaattumik oqaluuserisassat allat ilimasaarutitaqanngitsumik siuartitaallutik. Illuatungiliuttut nassuiaataat naapertorlugu taama pisoqartillugu ataatsimiittarfimmiinngitsut oqaluuserisassap tulliata oqaluuserineqalinnginnerani isernissaasa utaqqineqaqqaartarnerat ileqquuvoq.

Pele Brobergili ataatsimiinnerup unitsillatsiarneqarnissaa kissaatiginiarlugu ataatsimiinnermi aqutsisumut ussersorsimagaluarpoq, taamaakkaluartoq ataatsimiinneq nanginneqarpoq, Tillie Martinussenillu siunnersuutaa immikkoortoq 99-iusoq oqallisigisassajunnaarpoq.

AAMMA ATUARUK Karl Frederik Danielsen isornartorsiutinut oqaaseqarusunngitsoq

- Inatsisartuni ilaasortat ataatsimiinnerni peqataanissaat qulakkeerumallugu pissarsiarineqaqqaartarput. Immikkoortoq taanna ullormi tassani oqaluuserisassani kingulliup tulleraa, taamaattumik unillatsiarnissatsinnut piffissaqarluarluta takusinnaavarput. Ajoraluartumilli unillatsiartitaanngilagut.

Unillatsiarnissamut piffissaqarsinnaasimannginnera aamma Tillie Martinussenip tupigusuutigaa, ilaasortammi oqaluuserisassamik nutaamik saqqummiussissatillugit unillatsiarnissaq periarfissaasarmat.

- Pele Brobergillu takusinnaammagu ataatsimiittarfimmiinngitsunga unillatsiarnissarput kissaatigisimavaa. Taamaaliunngitsiartoq ataatsimiittarfimmiit anivunga. Ataatsimiinnermili aqutsisup tamanna ilaginnarlugulu siunnersuutiga oqaluuserisassaajunnaartippaa.

Aalajangiilertorneq

Ataatsimiinnermili aqutsisoq Justus Hansen (D) piffissaalatsisimanerarpoq, ilaasortammi qanoq sivisutigisumik oqaaseqarniarnersut naluersorneqarsinnaasanngimmat. Siunnersuummik saqqummiisussaq ilaasortallu allat utaqqillugit sooq unillatsiartitsisinnaasimannginnersoq aperineqarami ima akivoq:

- Taama pisoqarmat aalajangiilertortariaqarpunga, taamaattumik oqaluuserisassap tullianut ingerlaqqippunga, Justus Hansen oqarpoq.

Ataatsimiinnermi aqutsisutut aalajangernera naammaginngikkaanni, Inatsisartut Siulittaasoqarfianut naammagittaalliutigineqarsinnaasoq erseqqissaatigaa.

AAMMA ATUARUK Paatsiveerutsitseqaaq: Angerpoq – naaggaarniarsimagaluarlunili

Muté Bourup Egede immikkoortoq oqaluuserisassaajunnaarmat aamma ataatsimiittarfimmiinngilaq. Immikkoortup 99-ip oqaluuserilernissaanut tuaviuutissaqarsorisimannginnami ullup qeqqasioriartorluni anisimavoq. Taaannalu immikkoortumik oqaluuserisassaajunnaartitsinermik aamma nalaarsisimanngisaannarnerarpoq.

Mittarfissualiornissat Inatsisartuni novembarip ulluisa 18-ianni oqaluuserineqarpata Partii Naleraq tatiginnikkunnaaqqusinermik nalunaaruteqarnissaminut periarfissaqaleqqissaaq.