Karl Frederik Danielsen isornartorsiutinut oqaaseqarusunngitsoq
Attaveqaqatigiinnermut naalakkersuisoq, Karl Frederik Danielsen, Kangerlussuup mittarfianut aningaasalersuisarnissaq pillugu KNR-imut kukkusumik paasissutissiinermi kingorna illuatungiliuttunit sakkortuumik isornartorsiorneqarpoq.
Pineqartulli naveerseqqusinerit, tunuaqqusinerit Demokraatiniilluunniit tapersersorneqarnini oqaaseqarfigerusunngilai.
AAMMA ATUARUK Naleraq: Karl Frederik Danielsenimut tatiginninngilagut
Mittarfiup aningaasalersortarnissaanut Danmarkimik atsiukkamik isumaqatigiissuteqarnersoq pillugu aperineqarami angernera isornartorsiorneqarneranut pissutaavoq. Angernerali oqartoorneriinnaasoq Karl Frederik Danielsen oqarpoq.
- Angerama oqajaartoorpallaalaarunarpunga, Karl Frederik Danielsen oqarpoq.
Taanna nangilluni oqarpoq, paaseqatigiittoqarsimanersoq pillugu aperineqarsoraluni angerluni.
Isumaqatigiissummik atsiugaqarsimanersut aperineqarpoq.
AAMMA ATUARUK Illersornissaqarfik Kangerlussuup ingerlanneranut akiliisussaasoq
Aalajangiusimagaa
Tassalu illersornissaqarfimmik aningaasaqarnermut tunngasumik atsiukkamik maanna isumaqatigiissuteqanngilaq. Aningaasaqarnermut tunngasut suleqatigiissitamit ukiumi ataatsimi misissorneqassapput.
Karl Frederik Danielsen nunanullu allanut tunngasunut naalakkersuisoq, Ane Lone Bagger, Danmarki akiliisuussasoq isumaqatigiissut pillugu tusagassiortunik katersortitsinermi arlaleriarlutik oqaraluarput.
Tamannalu Karl Frederik Danielsenip aalajangiusimavaa. Illersornissamut ministerip, Trine Bramsenip, oktobarip ulluisa arfineq-aappaanni oqaaseqaataa taamaaliornerminut tunngavigaa.
Bramsen ilaatigut ima oqaaseqaateqarpoq: "Suleqatigiissitamik aningaasaqarneq pillugu sukumiisumik misissuisussamik pilersitsisoqarpoq. Illersornissaqarfiup akisussaaffigiligassamini tamatumunnga, tassungalu ilanngullugu nalunngilaa ilisimallugulu iluarsaassinissamut mittarfiullu ingerlaqqinnissaanut atatillugu aningaasartuuteqartussaasoq”.
- Iluarsartuunnissaanut ingerlateqqinnissaanullu aningaasartuutit matussuserumaaraat taassuma uppernarsarpaa, oqaaseqaallu taanna innersuussutigisinnaavara, Karl Frederik Danielsen oqarpoq.
Illersornissaqarfilli 2023-mi ingerlatsisuulerpat nunatta mittarfimmut aningaasartuuteqartannginnissaa naalakkersuisup neriorsuutigisinnaanngilaa.
- Illersornissamut ministerip oqaatigeriigai kisimik aallaavigisinnaavakka, Karl Frederik Danielsen oqarpoq.
