VIDEO Partii Naleqqap Siumullu isumaqatigiinniarnerat allanit sivisunerusoq
Hans Enoksenip partiia nutaaq, Partii Naleraq, partiit oqaloqatigineqartut pingajuattut oqaloqatigineqarmat ersaattartoqarlunilu hurrartortoqartoq tusaaneqarsinnaavoq.
- Ilarpununa nuannersumik oqarmat ersaattaattugut, Hans Enoksen ataatsimiinnerup kingorna oqarpoq.
Siumumut ilaasortaasimasoq parteeqatini peqatigalugu Siumup siulittaasua Kim Kielsen, Kommune Kujallermi borgmesteri Jørgen Wæver Johansen, Karl-Kristian Kruse allallu ataatsimeeqatigai.
- Oqaloqatigiippugut. Saqqummiussaqarput uagullu aamma saqqummiussaqarluta. Politikkikkut anguniakkavut eqqartorpagut, siullermilli oqalorusaaqqaarpugut kaffisorlutalu, Hans Enoksen KNR-imut nassuiaavoq.
IA ataatsimeeqqinnissamut qilanaarpoq
Qinersinermi ajugaasoq partiit allat nalunaaquttap akunnerani ataatsimi ataatsimeeqatigai, ilaasortaatitaqalernerpaallu najoqqutaralugit tulleriiaarneqarput. Partii ataatsimeeqatigineqaqqaartoq tassaavoq Inuit Ataqatigiit, taanna Siumut assingalugu Inatsisartuni aqqanilinnik ilaasortaatitaqalerpoq.
- Ataatsimiinneq ingerlalluarpoq, naapeqqissallutalu oqaatigisinnaavara, IA-p siulittaasua, Sara Olsvig, KNR-imut oqarpoq.
Qaquguussanersoq nalunerarpaa, aamma oqaaseqarusuppallaanngitsoq malunnarpoq.
- Suut eqqartorneqarnersut itisilersinnaanngilanga, kisianni oqaloqatigiinnerput ingerlalluarpoq, Sara Olsvig oqarpoq.
Aamma atuaruk GA: Kim Saralu maanna maligassiuisussanngorput
Demokraatit siulittaasuat, Anda Uldum, Siumup siuttuinik nalunaaquttap akunnerani ataatsimi aamma ataatsimeeqateqarpoq.
- Ingerlalluarpoq, aamma oqaloqatigiilluarpugut, taama oqarpoq, sunalu ingerlalluarsimanersoq iserfigiumanagu.
Atassut aamma Siumumik oqaloqateqarpoq, siulittaasorli Kund Kristiansen ataatsimiinnerup kingorna oqaaseqarusuppallaanngilaq.
- Ingerlalluarpoq. Siumukkut kaffiutaat mamarpoq, allamik oqaaseqarsinnaanngilanga.
Aamma atuaruk Kim Kielsen kimigiiserfigineqartoq
Kim Kielsen aamma oqaaseqarpianngilaq.
- Maanna isumaliuteqassapput, taava oqariartuutigineqartut assigiinngitsut oqimaalutarlugit suliarput ingerlateqqissavarput. Isumaqatigiinniarnerit torersumik nipilimmik ingerlanneqarput, Siumup siulittaasua ippassaq ataasinngornermi ualikkut taama oqarpoq.
