Partii Naleqqap Erik Jensen ilasseraanngikkaa
![](/sites/default/files/styles/image_934x467/public/article_images/img_7101.jpg?itok=SUpEi5Sg)
Siumut Partii Nalerarlu naalakkersuisoqatigiilertussanngorpasinngillat.
Siumup siulittaasuata Erik Jensenip Siumullu siulittaasuanut tullersortip Vivian Motzfeldtip siuttuuffigisaannik partiimut ataasinngornermi isumaqatigiinniareerlutik, Pele Broberg taama nalunaarpoq.
Naalakkersuisut siulittaasuata Kim Kielsenip Siumumilu aqutsisut akerleriippallaartut, Pele Broberg oqarpoq.
- Siumup aammalu Naalakkersuisut taamatut akerleriitsigisunik nalunaaruteqartillugit inerneriinnarpaa tatigineqarsinnaanngimmata, taanna Facebookimi allappoq.
Demokraatit ataasinngormat naalakkersuisoqataajunnaarput. Siumut Nunatta Qitornaalu ikinnerussuteqarlutik naalakkersuisoqatigiiginnassasut, naalakkersuisut siulittaasuat tamatuma kingunitsiannguani nalunaarpoq.
AAMMA ATUARUK Demokraatit naalakkersuisoqatigiinnit aninerisa kingorna: Kielsen qinersinissamik suaaruteqanngitsoq
Nunatta Qitornaasa IA siammasissumik naalakkersuisoqatigilerumanngikkaat, Nunatta Qitornai aamma nalunaarpoq.
Suleqatigiinnermullu peqataalluarumannginneq ingalluni pisarissersuutaassasoq, Partii Naleraq isumaqarpoq.
- Nunatta Qitornaaniit taamatut ersaritsigisumik nalunaaruteqareermata suleqatigiinnermut siammasissumik peqataaniarnatik, aammalu Siumup Naalakkersuisooqatigiinni suleqateqarnertik ingerlatiinnalermassuk, taava imatut paasineqassaaq, Naalakkersuisut siulittaasua piumassusseqanngitsoq Naalakkersuisut atorunnaarnissaannut, atanissaminnut isumaqatigiissummik nutaamik sanasoqarnissaa utaqqiniarnagu imaluunniit qinersisoqarnissaa piumanagu, Pele Broberg allappoq nangillunilu:
- Tamanna pissutigalugu Partii Naleraq oqaloqatigiinnissamut peqataasinnaanngilaq, taama tukatsigisumik naalakkersuinikkut aqutsisoqarniartillugu.
Taamaammat Partii Naleqqap kajumissaarutigaa Inatsisartunut qinersoqassasoq.