Partii Inuit inuiaqatigiinni naleqartitat pillugit oqallinnissamut aggersaavoq

Oqallitsitsineq Nuummi Ukaliusap atuarfiata kantiinaani sapaammi apriilip 28-ani nal. 19.00-mit 21.00-imut ingerlanneqassaaq.

-Inuiaat killiffipput ilungersunartoq eqqartortigu aaqqiissutissanillu nassaarsioqatigiilluta, Randi Broberg Partii Inuineersoq Inatsisartunullu ilaasortaq tusagassiorfinnut nalunaarummi allappoq.

Partii Inuit akuersaasinnaanngilaa ammip qalipaataa pillugu isummat inunnut ataasiakkaanut tutsinniarneqaqattaarnerat, taamatullu tusagassiutitigut naliliisitsisarnerup illuinnaasiorpaluttumik kiisalu tusagassiorfiit killormut saatitseqattaarnerat akuersaarneqarsinnaanngitsutut isigalugu. Partii Inuit pingaartippaa inuiaat ataatsimut isigalugit nukittunerulluta ingerlariaqqinnissarput,  Randi Broberg allappoq.

-Ajornartorsiutit pillugit toqqaannarnerusumik ammasumillu oqallinnissarput kissaatigaarput. Isummavut tamaasa anninnissaat tusagassiuutini ajornakusoorsimavoq, taamaammat immitsinnut qanimut isigaluta ajornartorsiutinik eqqartueqatigiinnissarput kissaatigaarput, Randi Broberg knr.gl-imut oqarpoq.

Kikkulluunniit peqataanissaminnut tikilluaqqusaapput, aamma oqaluttaasoqarumaarpoq, Randi Broberg Partii Inuit siulersuisui sinnerlugit allappoq.