Folketingimut qinersineq 2015 Naalagaaffeqatigiinneq pillugu ministereqarfissamik eqqarsarneq partiinit isumaqatigineqanngilaq

Tamanna kinguariarnerussaaq, Demokraatit isumaqarput. Nunatta Danmarkillu akornanni suleqatigiinneq ajorseriassaaq, Atassummit oqaatigineqarpoq. Taama piumasaqarneq siusippallaaqaaq, Siumumit qisuariartoqarpoq.

Naalagaaffeqatigiinneq Issittorlu pillugit Kalaallit Nunaata soqutigisai, Danmarkimit pitsaanerusumik isumagineqartalernissaat Inuit Ataqatigiinnit qularnaarneqarusuttut, Inuit Ataqatigiit siulittaasua, Sara Olsvig oqarpoq.

Danmarkimit suli oqartussaaffigineqartut pillugit inatsisit Nunatsinnut naleqqussarneqarneri, danskit naalakkersuisuinit sumiginnarneqarpallaartut, Aaja Chemnitz Larsen (IA), isumaqarpoq.

Inuit Ataqatigiilli piumasaqaataat Inatsisartuni partiinit allanit isumaqatigineqanngillat.

Kalaallit Nunaannut tunngasunut ministeriaqarfeqalernissamik oqalunneq qanga pisimasunut uteriarnerussasoq, Atassummit taamatullu Demokraatinit isumaqarfigineqarpoq oqarlutik Nunatta namminiilivinnissaannut sulinermi tamanna kalluaasinnaasoq.

- Kalaallit Nunaannut tunngasunut ministeriaqalernissamik kissaateqarneq nammineersinnaannginnitsinnik takussusiiginnartussaavoq, tusagassiuutinut nalunaarumminni Demokraatit allapput.

Ministeriaqalernissamik piumasaqarnermi Kalaallit Nunaata Danmarkillu akornnni suleqatigiinneq pitsaanerulernavianngitsoq, Atassut sinnerlugu folketingimut qineqqusaartoq, Steen Lynge siulittuivoq.

Taassuma kissaatigineruaa, suleqatigiissitani ataatsimiittartoqatigiinnilu arlalinni ilaasortaatitaqalernissaq, soorlu inatsisit pillugit ataatsimiititaliami folketingillu nunanut allanut tunngasutigut ataatsimiittartoqatigiivini, taamaalilluni Kalaallit Nunaata soqutigisaanik angusaqarnerusinnaasoqarmat.

- Atassummit isumaqarpugut, qinikkat toqqaannartumik Nunatsinnut attuumassuteqartunik folketingimi suliaqassagunik taava soorlu nunanut allanut tunngasunut ataatsimiititaliami illersornissarlu pillugu ataatsimiititaliami minnerpaamik ilaasortaasariaqapoq. Taamaasilluni taakku aqqutigalugit Danmarkimi naalakkersuisut suliaat Nunatsinnut tunngasut nakkutigineqarlutik, Atassut sinnerlugu folketingimut qiningassanngortittoq, Steen Lynge oqarpoq.

Kalaallit Nunaannut tunngasunut, soorlu aningaasat allallu eqqartorneqartillugit tamanna oqallittartoqatigiinnit pilersitsinikkut anguneqarsinnaasoq, Siumut sinnerlugu folketingimut qiningassanngortittup, Martha Abelsenip piukkunarnerutippaa.

- Danmarkimi ministeriaqarfiit ullumikkut atuutereersut atorluarnerisigut aamma apeqqutit Nunatsinnut tunngasut nutaamik oqallittarfimmik pilersitsinikkut, toqqaannarnerusumik qulakkeerinninnerusumillu suliarineqartarnissaat, uangut eqqarsaatigineruarput, Folketingimut Siumut sinnerlugu qiningassanngortittoq, Martha Abelsen taama oqarpoq.

Kalaallit Nunaannut Issittorlu pillugit ministeriaqarfeqalernissaa piviusunngussappat, tamanna Folketingimi ilaasortat amerlanerussuteqartut suleriaatsip allanngortinneqarnissaa pillugu isumaqatigiittariaqartut, Inatsisartut Allattoqarfiata nalunaarutigaa.