Palle: Ilinniartut ikiorusuppagut, kommunilli suleqatigisariaqarpagut

Naalakkersuisup Palle Christiansenip, Demokraatit tunuliaqutaralugit Inatsisartunut qinigassanngorteqqittup ajornartorsiutip piunera ilisimaaraa, kommunilli sisisaamasut ikioqataanerisigut aatsaat aaqqinniarsinnaanerarlugu. Meeqqanummi paaqqinnittarfeqrtitsineq nunatsinni kommuninit akisussaaffigineqarpoq.

-Paaqqinnittarfeqarnikkut inissisimanerput pissutigalugu nunani allani ilinniartortatta angerlarsinnaannginnerat ajorluinnarpoq. Kommunit peqataaffigerusuppassuk, ataatsimoorluta immaqa aaqqiissuteqarfiginiarsinnaavarput. Ilaatigut paaqqinnittarfinnik sanaartornermut tunngatillugu aningaasaleeqataasinnaavugut, affaa uagut akilerlutigu affaalu kommunit akilerlugu. Tamanna kommunit tungaannit peqataaffigerusunneqassasoq neriuutigaara, Palle Christiansen knr.gl-imut oqarpoq.

Inuiaqatigiinnili kalaallini meerarpassuit paarineqarnissannut paaqqinnittarfiit illutai kisiisa pisariaqartinneqanngillat. Perorsaasut aamma pisariaqartinneqarput, nunatsinnilu paaqqinnittarfeqarnikkut ajornartorsiutit iluarsiviiginiassagutsigit perorsaasunik suli amerlanerusunik ilinniartoqarnissaa pisariaqarpoq, perorsaasullu pigeriikkavut ilinniaqqinnissamut periarfissaqarnissaat qulakkeerneqartariaqarpoq.

-Perorsaasut kingullermik isumaqatigiissuteqarfigigatsigit ilinniaqqinnissamut aingaasanik amerlanerusunik immikkoortitsisoqarnissaa qulakkeerparput, aamma Ilulissani perorsaasunngorniarfiup naammassisaqarsinnaassusaata annertusarnissaa ilungersorluta sulissutiginikuuarput. Paaqqinnittarfeqarnikkut neqeroorutigisartakkatta pitsaassusaat qulakkeerniarutsigu, perorsaasunik amerlanerusunik pisariaqartitsivugut. Tamanna iluarsineqanngippat, nunani allani ilinniartuutivut angerlarnavianngillat, Palle Christiansen oqarpoq.