Palæstinamiut parnaarussat 33-t Israelimit iperagaasut

Palæstiinamiut 33-t Israelimi parnaarussaaqqasut unnuaq iperagaapput.

Nutaarsiassaqartitsivik AFP taama allaaserisaqarpoq.

Palæstiinamiut arnartaat inuusuttullu, Israelimi parnaarussivinni assigiinngitsuni parnaarussaaqqasut, iperagaanissaat ilimagineqareerpoq. Iperagaasut akornanni inuusunnersaat 14-inik ukioqarpoq.

Israelip Hamasillu akornanni ulluni sisamani sakkuaakkunnaarallarnissamik isumaqatigiissut atuutilermalli, palæstiinamiut 150-it maannamut taava iperagaasimalerput.

Sakkuaakkunnaarallarnissamik isumaqatigiissutip ullunik marlunnik sivitsorneqarnissaa isumaqatigiissutigineqartoq, Israelip Hamasillu siusinnerusukkut uppernarsarpaat.

Israelimiut islamisiortunit Hamasikkunnit sallunaveeqqutitut tigummineqartut iperagaasut amerlineqarpata, palæstiinamiut arnartaat Israelimi parnaarussaaqqasut 50-it iperagaasussat allattorsimaffiaannut ilanngunneqarumaartut, Israelip ministeriunerata Benjamin Netanyahup allattoqarfiata ilisimatitsissutigaa. Nutaarsiassaqartitsivik Reuters taama allappoq.

Sallunaveeqqutitut Hamasimit tigummineqartut, marlunngornermilu iperagaasussatut nalunaarsorneqarsimasut pillugit allattorsimaffik, Israelip naalakkersuisuisa tigusimavaat.

Sallunaveeqqutitut tigummiarneqarsimasut aqqanillit ikiuiniaqatigiiffimmut Røde Korsimut ataasinngornermi unnukkut tunniunneqarput, Gazamiillu Israeliliartinneqarlutik.

Iperagaasut nunanit allaneersuusut, Qatarip nunanut allanut tunngasunut ministeriata Majed al-Ansarip oqaaseqartuata oqaatigaa, tassa franskisut innuttaassusillit pingasut, Tysklandimeersut marluk, Argentinameersullu arfinillit. Israelimiorpassuit marloqiusamik innuttaassuseqarput.