Pakistanip qooruisa ilaanni majuartaammi ingerlariaqqissinnaajunnaartut tamarmik annaanneqartut

Pakistanimi sivisuumik ajornakusoortumillu annaassiniarneq iluatsilluarpoq.

Inuit arfineq-pingasut Pakistanip qooruisa ilaanni majuartaammi ingerlariaqqissinnaajunnaartut maanna annaanneqarput. Majuartaat 300 meteringajannik qutsitsigisumiilluni unittoorpoq ingerlariaqqissinnaajunnaarlunilu.

Pakistanip nunamut namminermut ministereqarfia taama ilisimatitsisoq, nutaarsiassaqartitsivik Reuters allappoq.

Majuartaat qooroq ikaarfigineqassagaangat nalinginnaasumik atorneqartarpoq, soorlu aamma atuartut allallu atuarfimmut atuarfimmmiillu angallanneranni atorneqartartoq.

Majuartaatip kabeliisa ilaat marlunngornermi aserorpoq, kingornalu annaassiniartoqalerluni. Akunnerit 15-it missaanni annaassiniartoqarpoq.

Qulimiguulik atorlugu aallaqqaammut annaasiniartoqarpoq, meeqqat arlallit tassani annaanneqarlutik. Taarsiartulermalli qulimiguulik atorlugu annaassiniarneq unitsinneqarpoq.

Qullersuarnik ajutoorfiup nalaani kingorna ikkussisoqarpoq annaassiniarnerlu nunaminngaanniit nanginneqarluni. Nutaarsiassaqartitsivik Reuters taama allappoq.

Immikkut ilisimasallit ajutooorfiup nalaanukartinneqarput, kabelit ilaannut issiaviusinnaasumik taakku ikkussipput meeqqallu ataasiakkaarlugit annaanneqarlutik.

Pakistanimi illoqarfiup Battagramip nalaani marlunngornermi ullaakkut nalunaaqutaq arfineq-marluk missaanni ajornartorsiortoqalerpoq.

Pakistan qaqqartuujummat majuartaatit angallannermi atorneqakulasut tuluit tv-qarfiata BBC-p allaaseraa.

Majuartaatit ilaat pisortatigoortumik akuersissutigineqarsimaneq ajorput, innuttaasut akikitsumik angallassinnaanissaannut ilaatigut atorneqartarlutik.