Atuisut aningaasaliinissamut akiliutaat maangaannanngitsut
Royal Arctic Line umiarsuarnik tallimanik sanatitsinissamik amutsivimmut polenimiittumut Remontowa Shipbuildingimut 2013-imi isumaqatigiissuteqarpoq.
Umiarsualiornerilli ajornartorsiutitaqartorujussuusimanerat umiarsuaatileqatigiiffiup naammagingilaa.
- Kinguaattoortaqattaarnerit pissutigalugit umiarsuit naammassinissaat ukioq sinnerlugu kinguaattooqqapput, Royal Arctic Linep pisortaanera, Verner Hammeken oqarpoq.
Jonathan Arctica Agnete Arcticalu pigilerneqassanngillat
Ingerlatseqatigiiffik amutsivimmut isumaqatiginninniarluni qisuariarpoq. Royal Artcic Linellu umiarsuit marluk pigilernavianngikkai isumaqatigiissutigineqarpoq.
Aamma atuaruk Tusagassiuut: RAL-ip umiarsuarsiassani marluk pisiariniarunnaaginnarai
- Umiarsuit marluk tuniniarneqarput. Umiarsuit taakku pisiariniaraluakkagut anngajaajupput, Agnete Arcticamik Jonathan Articamillu taagorneqartussaagaluarlutik, Verner Hammeken oqarpoq.
Royal Arctic Lineli tuniniaasuunersoq umiarsuarsiniarnerluunniit taamaatiinnarneqarsimanersoq, pisortaanerup oqaatigerusunngilaa.
Qularnaatsoqarporli:
- Umiarsuit naammassinissaannut anguniagassatut pilersaarusiap eqquutsinneqannginnera amutsivimmit akisussaaffigineqartoq isumaqarpugut, Royal Arctic Linep pisortaanera, Verner Hammeken oqarpoq.
Atuisunit akiliutigineqartut maangaannanngillat
Royal Arctic Linep umiarsuassai aningaasassaqartikkumallugit atuisut aningaasaliinissamut akiliummik aningaasanut inatsimmi 2011-mi pilersitsisoqarpoq, tassa atuisartut umiarsuakkut nassiussigaangamik akip qaavatigut 3,1 procentimik akiliisarlutik.
Aamma atuaruk Polenimi umiarsualiorfik: RAL oqaloqatigaarput
Kisianni atuisut aningaasaliissutissanut akiliuterpassui umiarsuit pisiassat tallimaasussaagaluartut maanna pingasuinnanngornerisigut maangaannarpat?
- Taamaattoqanngilaq, Royal Arctic Linemi pisortaaneq Verner Hammeken oqarpoq. Innuttaasulli ernummateqarnerat paasisinnaalluarpaa, Verner Hammeken oqarpoq, nangillunilu:
- Paasisinnaalluarpara. Taakkuali maluk nutaat umiarsuaatigilinngikkaluarutsigilluunniit allanit umiarsuaateqalissaagut. Tassami umiarsuaatitaartornissamik pilersaaarupput suli atuuppoq.
Umiarsuarnik nutaanik suli pisariaqartitsisoq
Tassalu umiarsualiorfimmi ajornartoortoqaraluartoq umiarsuarnik nutaanik pisariaqartitsinera allanngornavianngitsoq Verner Hammekenip oqaatigaa.
Aamma atuaruk RAL-ip kisermaassisussaatitaanermi taamaatinneqarnissaa piareersimaffigigaa
- Umiarsuit nutaanik taarsersornissaannik ajornartorsiut qaangiunnavianngilaq. Suli nutarsaavugut. Umiarsuit marluk aallaqqaammut eqqarsaatigisaguinnaanngitsut aamma Johanne Christina, Tunumi angalasartoq, pilersaarummi siullermi ilaanngikkaluartoq aamma ilaalerpoq.
Innuttaasullu aningaasanit iluaqutissaqarumaarlutik naatsorsuutigisinnaagaat, umiarsuaatileqatigiinni pisortaaneq oqarpoq.
Aamma atuaruk Kisermaassisuuneq oqallisissanngortinneqartoq
- Umiarsuarnik nutaanik pitsanngorsaanitsigut aningaasat uteqqikkumaartut innuttaasut neriorsorpagut.
Umiarsuit marluk suli naammassineqanngitsunut isumaqatiginninniarnerit suli ingerlanneqarput. Nunaqarfinnulli angallat sapaatit akunnerini marlunni tunniunneqarumaartoq, umiarsuarlu anginerusoq aggustimi tunniunneqarumaartoq, Verner Hammekenip ilimagaa.
