RAL-ip kisermaassisussaatitaanermi taamaatinneqarnissaa piareersimaffigigaa

Umiarsuaatileqatigiiffiup pisortaanerata Verner Hammekenip, nittartakkamut assarrtuinermut tunngasunut allaaserisaqartarfimmut ShippingWatchimut tamanna oqaatigaa.

Royal Arctic Linep Islandimiut umiarsuaatileqatigiiffiannik Eimskipimik suleqateqalernissaa pissutaalluni Nunatsinnut Nunatsinniillu immakkut assartuinermi kisermaassisuunerata taamaatinneqarnissaanut ammaassivoq.

Assartuinermi unammillertoqalernera umairsuaatileqatigiiffimmut pingaartumillu inuiaqatigiinnut iluaqutaanerusinnaavoq, assartuinermi aningaasartuutit ikinnerulersinnaammata, Verner Hammeken oqarpoq, assartuinermilu kisermaassisuunissaq aamma apeqquserlugu:

Aamma atuaruk RAL unammillerneqartariaqartoq

- Kalaallit Nunaannut Kalaallit Nunaanniillu assartuinermi sapinngisamik aningaasartuutikinnerunissaq pisortat suliffeqarfiutaatut taamaallaat naammassiniartussaavarput, Verner Hammeken ShippingWatchimut oqarpoq.

Umiarsuit containerersornermut atorneqartussat nutaat annerillu pingasut sananeqarnissaannut pilersaarnermik, umiarsuaatileqatigiit marluk Royal Arctic Linep Eimskipillu ukioq manna maajimi atsioqatigiissutigaat.

Isumaqatigiissulli atuutissappat piginnittunit akuersissutigineqaqqaassaaq, tassalu Namminersorlutik Oqartussat, Islandip naalakkersuisui, EU-llu unammilleqatigiinnermut nakkutilliisui akuerseqqaartussaallutik.

Aamma atuaruk Umiarsuit nutaat Sikuki Harbourilu RAL-imut unammillernarput