RAL unammillerneqartariaqartoq

Royal Arctic Linep containererinik Kalaallit Nunaannut Kalaallit Nunaanniillu assartuinermi kisermaassisuunera suliffeqarfiup assartuinermik suliallip Usisaatip pisortaata Hans Gerstrømip isornartorsiorpaa.

Namminersorlutik Oqartussat suliffeqarfiata Royal Arctic Linep containerinik assartuineq 1993-imiilli kisermaappaa, tamannalu allanngortinneqarnisssaa Hans Gerstrømip neriuutigaa:

- Umiarsuaatileqatigiiffiup unammillerneqarsinnaanissaa kissaatigigaluarpara. Umiarsualivillu nutaap pilersinneqarneratigut amerlanerit sullissisuulersinnaasut takorloorpara, Usisaatip pisortaa, Sikuki Nuuk Harbour, novembarimi naammassisussatut naatsorsuutigineqartoq pillugu, immakkut angallannermut tunngasunik allaaserinnittarfimmut Søfart.dk-mut oqarpoq.

Nassiussassanik naammassinnittartup Blue Water Shippingip pisortaa Jesper Øraker aamma isornartorsiuivoq:

- Kisermaassisoqarneranut akerliuvunga, unammillertoqarsinnaanissaalu soorunami piviusorsiortutut isigaara, Jesper Øraker, Søfart.dk-mut oqarpoq.

Aamma atuaruk Umiarsuit nutaat Sikuki Harbourilu RAL-imut unammillernarput

RAL: Kisermaassineq pissusissamisoorpoq

Royal Arctic Linep containerinik assartunermi kisermaassisuunerata ajornartorsiutaasinnaanera, Royal Arctic Linep pisortaata Verner Hammekenip Søfart.dk-mut nassuerutigaa:

- Kisermaassisuutilluni allatulli ullut tamaasa ilungersorfiuneq ajorpoq, Verner Hammeken oqarpoq, kisermaassisuunerlu pissusissamisuuginnartutut isigalugu:

- Kisermaassisuuneq pissusissamisoorpoq. Nioqqutissanik Kalaallit Nunaannut Kalaallit Nunaanniillu assartuinermi annertuumik ingerlatsineq iluaqutissartaqanngilaq, umiarsuit mikisuinnaammata. Nunaqarfiit tamarmik taassuma saniatigut kiffartuunneqartussaapput, Verner Hammeken, Søfart.dk-mut oqarpoq.