Tusagassiuut: RAL-ip umiarsuarsiassani marluk pisiariniarunnaaginnarai
Maritime Danmark naapertorlugu umiarsuarnik sanaartortitat anginersaat Malik Arctica aamma umiarsuit nunaqarfinnut pajuttaatissat akunnattumik angissusillit aappaat Agnethe Arctica pineqarput.
Maritime Danmark allappoq paasissutissat tusarfinnit assigiinngitsunit marlunnit, kinaassutsiminnik isertuusserusuttunit, pissarsiarisimallugit.
Aamma atuaruk ASSIT RAL-ip umiarsuartaassaasa tallimaasut ilaat ataaseq Polenimi singinneqarpoq
RAL-ip oqaaseqarfigerusunngikkaa
Maritime Danmarkip RAL-imi attaveqaqatigiinnermut nittarsaassinermullu pisortaq Ann-Britta A. Hansen oqaloqatigisimavaa, taassumalu umiarsuaatileqatigiiffiup umiarsuarnik marlunnik pisiniarunnaarnera Maritime Danmarkimut uppernarsarusunngilaa, illuatungaatigulli aamma paasissutissat eqqortuunngitsutut oqaatigerusunnagit.
- Oqaaseqarfigerusunngilarput, Ann-Britta A. Hansen Maritime Danmarkimut taama oqarpoq.
Royal Arctic Linep Polenimi umiarsualiorfik umiarsuarnik immikkut ittunik tallimanik sanaartortitsinissamik maajip 31-iani 2013-imi isumaqatigiissuteqarfigaa. Umiarsuaq containerilersuut angisooq - Malik Arctica - Mary Arcticap maanna Nuup Aalborgillu akornanni assartuussisup assinga ineriartorteqqinneqarsimasorlu, kiisalu umiarsuit nunaqarfinnut pajuttuisussat sisamat.
Umiarsuit nunaqarfinnut pajuttuisussat assigiinngitsuupput marluk. Mikinerit 36 TEU-mik usisinnaassuseqarput, anginerusullu containerilersuutaapput 103 TEU-mik usisinnaassuseqarlutik.
Umiarsuit containerilersuutit mikinerit aappaat, Ivalo Arctica, marsip 23-ani umiarsuaatileqatigiiffimmut tunniunneqarpoq, pilersaarutillu malillugit juulip qiteqqunneranit umiarsuarnut pajuttuilertussaalluni. Taamanilu nalunaarutigineqsrpoq umiarsuit sinneruttut 2016-imi kvartalip aappaani tunniunneqarnissaat naatsorsuutigineqartoq, Maritime Danmark taama allaaserisaqarpoq.
NUTARTIGAQ:
Umiarsuarnik sanaartortitsinerup iluani qaqugu tigusaqarnissaq ullulerlugu umiarsuaatileqatigiiffiup oqaaseqarfigiumanngikkaa, Royal Arctic Linep tusagassiuutinut nalunaarummi ullumi ullaap tungaani allaaseraa. Kinguaattooqqasoqarnerali nassuerutigineqarpoq:
- Isertuussassaagunngilarli sanatitsineq annertuumik kinguaattoornertaqarmat. Siullermik umiarsualiorfik Stralsund akiliisinnaajunnaarmat kingornalu aamma kinguaattuungaatsiarnertalimmik Polenimi umiarsuit sanitinniakkat nanginneqartussanngormata, Royal Arctic Line tusagassiuutinut taama allaaserisaqarpoq.
Umiarsualiorfik umiarsuarnik tunniussivissanik ullunik nutaanik Royal Arctic Linep isumaqatigiissusiorfiginiarsimagaa aamma nalunaarutigineqarpoq, isumaqatigiinniarnerillu naammassippata, ullullu tunniussivissat inissippata Royal Arctic Line avammut nalunaaruteqarumaartoq ilisimatitsissutigineqarportaaq.
Royal Arctic Linep Polenimi umiarsualiorfik umiarsuarnik immikkut ittunik tallimanik sanaartortitsinissamik maajip 31-iani 2013-imi isumaqatigiissuteqarfigaa. Umiarsuaq containerilersuut angisooq - Malik Arctica - Mary Arcticap maanna Nuup Aalborgillu akornanni assartuussisup assinga ineriartorteqqinneqarsimasorlu, kiisalu umiarsuit nunaqarfinnut pajuttuisussat sisamat.
Umiarsuit containerilersuutit mikinerit aappaat, Ivalo Arctica, marsip 23-ani umiarsuaatileqatigiiffimmut tunniunneqarpoq, pilersaarutillu malillugit juulip qiteqqunneranit umiarsuarnut pajuttuilertussaalluni.
