Paavi Canadami atuarfinni angerlarsimaffiutigisuni nunap inooqqavinik atornerluineq pillugu utoqqatsertoq

- Ilagiit katuullinut ilaasortat ilaasa pissusilersortarsimanerisa Guutimit isumakkeerfigineqarnissaannik qinuvunga, naalliuutigalugulu qamannga pisumik oqarfigisinnaavassi.

Paavi Francis nunap inoqqaavisa meerartaat Canadami atuarfinni angerlarsimaffiutigisuni ilagiinnit katuullini aqunneqartuni atornerlunneqartarsimaneri pillugit pisortatigoortumik utoqqatsernermini taama oqarpoq.

Nunanit tamalaanit tusagassiuutit arlallit taama allapput.

AAMMA ATUARUK - Nunguteriaraluarpaatigut sulili maaniippugut

Ruumami Vatikanimi persuarsiornermut Canadami nunap inoqqaavisa siuttuinit najuuffigineqartumut atatillugu utoqqatserpoq.

- Paavip ullumi oqaasii eqqaamaneqartuassapput. Tamanna qularnanngilaq. Pisariaqarput iluarisorujussuuakkalu, Reuters naapertorlugu, Métis National Councilip siulittaasua Cassidy Caron oqarpoq.

Paavip Canadamut tikeraarluni utoqqatseqqinnissani oqalugiarnermini neriorsuutigaa.

Atornerluineq

Kinguaariinni arlalinni meeqqat atuarfinni angerlarsimaffiutigisuni 1831-mit 1990-ikkut qiteqqunneranni atuuttuni atornerlunneqartarsimanerat ilagiinnit katuullini nassuerutigineqarnissaat Canadami nunap inoqqaavisa sivisuumik kissaatigaat.

First Nationsinit, Inunnit Métisiniillu meeqqat 150.000-init amerlanerusut ukiut ingerlanerini atuarfinni najugaqarput.

Atuarfiit angerlarsimaffiutigisorpassuit ilagiinnit katuullinit ingerlanneqarput, nunallu inoqqaavisa kulturiat oqaasiilu nungutinniarsarisarsimagaat kingorna uppernarsarneqarpoq.

AAMMA ATUARUK Ilumoortoq paasitinnagu ajoquserneqarnermit kingunerlutsitsineq maminnavianngilaq

Meeqqat nakuuserfigineqartarsimapput, kinguaassiuutitigullu atornerlunneqartarsimallutik. Meerarpassuit toqupput, nassaarineqarnikuunngisaannarlutillu.

Meeqqat 200-nit amerlanerusut saarngii nalunaaqqutserneqarsimanngitsuni assanneqarsimasut illoqarfimmi Kamloopsimi atuarfiup eqqaani siorna nassaarineqarput.

Kanngusuttoq pisuusutullu misigisimasoq

Atuarfinnilu arlalinni allani kingorna misissuisoqalerpoq.

Atuarfiit angerlarsimaffiutigisut ingerlanneqarnerat ilagiinnit katuullinit peqataaffigineqarnerat Canadami biskoppit siorna utoqqatsissutigaat.

Tassalu paavi tallimanngormat utoqqatserpoq.

- Canadami biskoppinut qatanngutinnut tapersiillunga utoqqatserpunga, Paavi Francis oqarpoq.

Kanngusulluni pisuusutullu misigisimalluni erseqqissaatigaa.

- Katuullit ilaasa ilissi anniartinneqarnersinnut atornerlunneqarnersinnut peqataanerannut, taavalu kinaassusissinnut, kulturissinnut anersaakkullu naleqartitassinnut ataqqinninnginnerannut utoqqatserpunga, Paavi Francis oqarpoq.