Paasisavummi ajugaasoq toqqarneqartoq

Inuiaqatigiit ikittut, kinaassuseq, ileqqullu nunatta siunissaanut qanoq pingaaruteqarsinnaanerinut paasiniaasimasoq ukioq manna ilisimatusartut unammineranni ajugaasuuvoq.

Allattoq Hanna Vestergaard Hviid

novembarip 14-at 2024 11:36

Nutserisoq Connie Fontain

Ph.d-nngorniarlutik ilisimatusartut tallimat Nuummi Katuami pingasunngornermi unammillutik ilisimatusarfigisaminnik saqqummiussilluarneqqusaapput.

Regine Møllerilu tassani ajugaavoq.

Unammisitsinermik aaqqissuussisoq, Arctic Hub tusagassiuutinut nalunaarummi paasissutissiivoq.

Aamma atuarukPaasisavummi naliliisussat nassaarineqartut

Regine Møller Aalborg Universitetimi ph.d-nngorniartuuvoq. Taanna suliamini kalaallit innuttaasut piujuartitsisumik ineriartortitsinermut qanoq isiginninnerannik misissuivoq. Taassuma tunumi nunaqarfik Isortoq paasisassarsiornermini aallaavigaa.

Ilisimatusartullu ajugaanini tupaallaatigaa.

- Upperiuminaappoq. Ajugaanissara naatsorsuutiginngikkaluarpara, Regine nuannaangaartoq tusagassiuutinut nalunaarummi oqarpoq.

- Ajugaanissara siunertarinngikkaluarpara, Isertorli pillugu oqarluttuarnissara siunertaralugu.

Ilisimatusarneq nuannersoq

Nunarput pillugu aamma nunatsinni ilisimatusarnerup innuttaasunut paasiuminartunngortinniarneqarnissaa unamminermi siunertaavoq. Taamaammat unammeqataasut minutsit tallimaannaat atorlugit piffissami massakkumiillutik aliikkusersuisumillu saqqummiinermi piginnaasaat malillugit naliliiffigineqartussaapput.

- Nunatsinni inersuarmi anginerpaami ilisimatusarnermut tunngasumik aliikkusersueqqissinnaanerput nuannaarutigilluinnarparput. Ilisimatusarnermi aamma nuannersuusinnaavoq, unnuk mannalu aamma nuannersuuvoq, Arctic Hubimi attaveqatigiinnermut akisussaasoq, Nicoline Larsen oqarpoq.

Unammisassat tallimat aaku

Kirstine Eiby Møller inuit ilagiillu kristumiut assigiinngitsut naapeqatigiinnerat tamatumalu inuit inuiaqatigiittut inuunerminni atugaannut sunniutai pillugit ph.d.- nngorniuteqarpoq: ‘Nunasiaataanermi kulturikkut naapeqatigiinnerit’.
Mie Møller Kalaallit Nunaanni coronamik nappaalanersuaqarnerani suleriaaseq pillugu ph.d.-nngorniuteqarpoq: ’Kalaallit Nunaanni COVID-19-imik nappaalanersuaqarneranut isiginnittaatsit’.
Lokesh Jain sermersuup killingani sikkussat taakkualu silap pissusiata allanngoriartorneranut sunniutai pillugit ph.d.-nngorniuteqarpoq: ’Sikkussat serminik iigartartunik allanngoriartortitsinerannik takussutissiaq’.
Regine Møller Isertumi innuttaasut piujuartitsilluni ineriartortitsinermut isiginnittaasiat pillugu ph.d.-nngorniuteqarpoq: ’Piujuaannartitsisumik ineriartortitsineq: Nunasiaatillit periusiinik attassiinnarneq, nunasiaataajunnaarsarneq Iserdormiullu isiginnittaasiat’.
Natacha Severin ilaatigut Kalaallit Nunaanni qalerallit ’jelly fish’-imik taaneqartartumik sarajappallaartumik nerpeqalertarnerat pillugu ph.d.-nngorniuteqarpoq: ’Kalaallit Nunaanni qalerallit uumassusilittut allanngorarnerat – Piujuartitsinermik, pitsaassutsimik nioqquteqarnermilu nalingannik pitsanngorsaaneq (Qaleralik)’.

Allisiguk

Unamminermi aalajangiisut Regine Møllerip paasissutissanik soqutigisaminillu saqqummiilluarnera unamminermi naliliisut pingaartippaat.

Ajugaasoq ajugaanerminit tammajuitsussarsiaqarnermi saniatigut 50.000 koruuninik aamma aningaasanik pissarsiaqarpoq.

Siunissami piniartuuneq

Regine Møllerip ilisimatusarnermini nammineq oqartussaanermik pisinnaatitaaffik aamma piujuartitsisumik ineriartorneq nunap inuiisa isiginninnerat tunngavigalugu misissuiffigaa.

Taassuma misissuinermini nunaqarfik Isertoq aallaavigaa. Nunaqarfimmi innuttaasunik sammisaqarluni inuiaqatigiit ikittut, kinaassuseq ileqqullu nunatta siunissaanut pingaaruteqarsinnaasut misissuiffigai.

Piniartuuneq nunatsinni kinaassutsitsinnut ilaalluinnarpoq, kisiannili nunaqarfeeqqat piujuarnissaannut aarlerinartorsiortitsisunik unammillernartoqarpoq.

Aamma atuarukPaasisavummi ajugaasoq: Oqariartuutiga maanna suli siammasinnerulersissinnaavara

Ilisimatusartut ilisimatusarfigisaminnik nassuiaagaangata sukkasuutut nipeqarlunilu paasiuminaassinnaasarpoq. Taamaammat unammeqataasut tallimat saqqummiinissaminnut ilinniartinneqarput.

Regine Møllerillu tamanna nuannaarutigilluarpaa.

- Ane Marie Ottosenip Paasisavummi unamminissaq sioqqullugu ilinniartitsinera qujamasuutigaara. Tamanna tamatsinnut ikiutaangaatsiarlunilu tapersiissutaavoq, taanna oqarpoq.

Nick Duelund Paasisavut siorna siullermeertumik aaqqissuunneqarmat ajugaasuuvoq. Taassuma kalaallit meerartaasa tamarmik atualinnginnerminni qanoq ilillutik isiminnik qanoq misissortissinnaanerat misissuiffigaa.

Arctic Hubip Paasisavut 2026 aaqqissuuteqqissavaa.

Nutaarsiassami kukkunermik nassaarsimaguit uunga allaffigineqarsinnaavugut.